Kalaallit Nunaanni nukittunerpaaq nunani allani unammerngaassaaq

Savalimmiuni Burn Showdownimi Kim Ujarak Lorentzen peqataassaaq

Savalimmiuni nunat tamalaat unammineranni Kalaallit Nunaanni nukittunerpaaq Kim Ujarak Lorentzen peqataassaaq

Ukiuni kingullerni marlunni Kalaallit Nunaanni nukittunerpaaq Kim Ujarak Lorentzen Savalimmiuni nunat tamalaat unammineranni peqataassaaq.

Tassani Danmarkimi, Tuluit Nunaanni, Polenimi Litauenimilu nukittunerpaat unammissallugit.

Kim Ujarak Lorentzen

Inunngorfik: Qeqertarsuaq

Ukiut: 26

Oqimaassuseq: 118 kiilu – aallannginnermi 120 kiilu tikinniarpaa

Amgissuseq: 186 centimeteri

Nuliaqarpoq marlunnillu qitornaqarlutik

- Nunani allani aatsaat siullermeerlunga unammeqataalerpunga, taamaammat misilittagaqalernerulernissara anguniarnerullugu peqataassaanga, Kim Ujarak Lorentzen Sermitsiaq.AG-mut oqarpoq.

12 kiilu ativai
Aasarli sungiusarujussuarnini aallartippaa. 106 kilot missaannik oqimaassuseqarluni sungiusarnini aallartippaa.

- Qaammatit marluk ingerlaneranni 12 kiilut ativakka, taamaattoq unammisassama ilai 160-170 kiilut missaannik oqimaassuseqartussaapput. Peqataanissannut angusaqarluarumallunga oqimaalisangaatsiarpunga, tamannalu oqittuinnaasimanngilaq. Kisianni unamminernut taamaattunut peqataassagaanni taamatut oqimaalisarnissaq pisariaqarpoq, oqaluttuarpoq.

Arsaannermi ajutooreernerup kingorna
Timigissarnini aallarpaa ajutoortoqareernerata kingorna.

- Tassami 15-it missaannik ukioqarlunga Qeqertarsuarmi arsaalluta qutuujarpunga. Nakorsanit suliarineqarsinnaasimanngilaq, taamaattoq innersuunneqarpunga nakkartalissanngippat sungiusartalertariaqagia. Tassani paasivar nukittorsarneq nuannersuusoq, maannakkullu qutuujarnikuunera ajoqquteqanngilaq, Kim Lorentzen oqarpoq.

Maanna timersuut aallulluartorujussuuaa.

- Pisinnaasara qaangerniarlugu nukittorsartuarpunga, tamannalu nuannarisorujussuuara. Sungiusartarnera pissutaalluni ilikkakkakka amerlaqaat, tassami paasinikuuara inuunermi pikkunartoqaleraangat uninngaannarluni suna tamaat iluarsisinnaanngitsoq. Sukataartariaqarpormi pitsaanissaq anguniarlugu. Ajornartorsiut uninngatiinnaraanni nikeriartoqarnavianngilaq, nammineq iliuuseqarnikkut aatsaat qaangerneqarsinnaapput. Ulluinnarni tamanna eqqarsartaaseq atortorujussuuara, soorlu ataataaninnut, uiuninnut, sulininnut inuuninnullu. Oqartarpunga isumatsassimangaarneq (depressioni) sungiusartarnikkut qaangerneqarsinnaasoq, Kim Ujarak Lorentzen oqarpoq. Taanna meeqqat inuusuttullu angerlarsimaffianni Kaassassummi atorfeqarpoq.

Pinialunneq

Sungiusarneq timigissartarfinni kisimi aamma ingerlanneq ajorpaa.

- Pinialunneq nuannareqaara, sungiusarnertut aamma atortarpara. Umimmaat arfineq marluk ukioq manna pisaraagut, ukioq kingulleq tuttut arfineq pingasut pisaralugit, oqarpoq.

Savalimmiunut unammiartornissani qilanaaraa.

- Pisinnaasakka tamaasa atorlugit sukataassaanga, neriuppungalu unammeriaatsini arlaanni ajugaasinnaassallunga. Aatsaat taama nukittutigalunga malugaara, nuannaarutigaaralu Fitnessgl-imit tapersersorneqarluarama, taakku aamma Savalimmiuni tapersersoqatigissavaannga, oqarpoq.

Powered by Labrador CMS