Kalaallit Nunaanni Economuseumi siullerpaaq
Nuummi amernik sullivik Kittat iluarsartuunneqareerluni pingasunngornermi ammaqqissaaq. Illup atuunnera nutarternikuuvoq
Nuummi illoqarfiup nutaanngitsortaani Kittat initai iluarsartuunneqareerlutik pingasunngornermi ammaqqinneqarpata oqaluartoqarlunilu nalliuttorsiortoqassaaq.
Kommuneqarfik Sermersuumi borgmester Asii Chemnitz Narup, Inuit Ataqatigiit sinnerlugu Kittat nutaanngorluni, pissanganartunngorlugu iseruminartunngorlugulu Economuseumitut taallugu ammaqqinneqassaaq.
- Nuannaarutigeqaara Kittat suliffeqarfittut pingaaruteqarluinnartoq ineriartorteqqinneqarmat. Taamalilluni ammerisarnerup attanneqartuarnissaa assassornermilu kusanartuliornissamut nutaanik periarfissaqalernissaq qulakkeerneqarluni assassornermilu suliat alutornarluinnartut kinguaariinnut inuusunnerusunut, avataaniit tikittunut allaniillumi kulturikkut kingornussatsinnik paasisaqarusuttunut takuneqariaannanngortinneqarlutik, Asii Chemnitz Narup oqarpoq.
Economuseumi Quebecimiit Canadamiittumit aallaaveqarpoq, siunertarivaalu assassortarnerup attattuarneqarnissaa, ineriartortitseqqiinermi tapertaanissaa, assassornermik ilinniarnissap orniginartunngortinneqarnissaa, niuernerup pissarsiaqaataasinnaanngornissaa najukkamilu asseqanngitsumik takornarissanut orniginarsaasoqarnissaa. Kittat Economuseuminngortinneqarnissaanut atatillugu suliniut Kommuneqarfik Sermersooq, Visit Greenland aamma Nunatta Katersugaasivia Allagaateqarfialu qanimut suleqatigalugit ingerlanneqarpoq.