unammilligassat
'Kalaallit Nunaanni danskisut isigineqarpunga Danmarkimilu kalaaliinnaallunga'
Kalaallit Danmarkimut nuuttartut amerlanerit inuuniarnermikkut ajornartorsiortartut misissuinermi takutinneqarpoq. Inuuniarnikkut ajornartorsiortut qanoq pitsaanerusumik ikiorserneqarsinnaasersut Christiansborgimi oqallisigineqassaaq
Danmarkimi atugarissaarnissamut ikiorsiissutinik amerlasuunik peqaraluartoq kalaallit inuuniarnermikkut ajornartorsiutillit periarfissat atorluarneq ajorpaat. Nammineerlunimi ikiorserneqarusunnermik nalunaaruteqartoqartarpoq, aamma nammineerluni inuiaqatigiinnut akuunissamut sulissuteqartoqartarpoq.
Danmarkimi kalaallit inuuniarnermikkut ajornartorsiortut pillugit taama naliliisoqarpoq.
- Kalaallit Nunaat Danmarkilu assigiipput. Tamanna pitsaanerusariaqaraluarpoq, taamaattoqanngilarli. Ajornartorsiuteqaraanni nammineerluni saaffiginnittoqartassaaq. Kalaallit amerlapput ajornartorsiornertik oqaatigineq ajoraat.
Kalaallini apersorneqartuni aqqaneq-marluusuni ilaat oqarpoq. Misissuineq ateqartinneqarpoq 'Kalaallit Nunaanni danskisut isigineqarpunga Danmarkimilu kalaaliinnaallunga'. Danmarkimi inuuniarnermikkut ajornartorsiutitik saqqummiuppaat, tassani angerlarsimaffeqanngitsuunertik, atornerluisuunertik saqqummiullugit.
Misissuineq Rådet for Socialt Udsattemut - inuunermut ajornartorsiuteqartunut isumaqatigiissitaq - saqqummiunneqarpoq. 2013-imi aningaasaliisoqarpoq kalaallit Danmarkimi inuunermikkut ajornartorsiutillit pillugit pitsaanerusumik atugassaqalerniassammata.
Saaffiginnissinnaannginneq
Kalaallit inuuniarnermikkut ajornartorsiutillit imaaliallaannaq saaffiginnissinnaanngillat, nunamili allamiit tikittut periarfissinneqartarput saaffiinninnissamut. Inuuniarnermikkut ajornartorsiortut nammineerlutik saaffiginnittarnissaat naatsorsuutigineqarmat. Oqaatsitigut kulturikkullu assigiinngissutsit pissutigalugit inuuniarnermikkut ajornartorsiutillit nammineerlutik saaffiginninneq ajortut kalaallit aqqaneq-marluk apersorneqartut oqarput, ilaatigullu aamma oqaatigineqarluni ikiorsiinerit ingerlaannaaq pineq ajortut.
Kalaallit inuuniarnermikkut ajornartorsiutillit Danmarkimi najugaqartut pillugit aqagu pingasunngornermi Christiansborgimi ataatsimiittoqassaaq. Jann Sjursen ataatsimiinnissamut isumassarsisuuvoq, inuunerminnut ajornartorsiuteqartunut isumaqatigiisitaq ataatsimiinnissamut aggersarneqarpoq kiisalu ilaqutariinnermut naalakkersuisoq Martha Lund Olsen Siumut aamma ataatsimiinnermi peqataassalluni.
Socialminister Manu Sareem Radikale Venstre-neersoq peqatigalugu inuuniarnermikkut ajornartorsiutillit qanoq pitsaanerusumik ikiorserneqartassanersut saqqummiissapput. Kiisalu aamma Københavnip kommunianit Peter Elleman peqataassaaq.
Københavnip kommuniani marloriaammik Aalborgip kommunianit kalaallinik inoqarneruvoq, Københavnillu eqqaaniittut eqqaassagaanni sisamariaammik amerlanerullutik.
Nalunaarusiaq danskisuinnaq allaqqasoq uani takuneqarsinnaavoq