Kalaallit nipilersortartui ullormut oqaluuserisassani ilaassaaq
Nipilersortartut kattuffia nutaamik siulersuisortaarpoq, taakkua kalaallit nipilersortartuisa politikerinit oqaluuserineqarnissaannik ujartuipput.
Kalaallit nipilersortartuisa inuiaqatigiinnut piorsarsimassutsikkut qanoq sunniuteqartiginerat pillugu annertuumik misissuiffigineqarnissaa pisariaqartoq, Nipilersortartut kattuffiat isumaqarpoq.
Politikkikkut peqataaneq
Politikerit kattuffiup tungaaniit piumasaqarneruniartut, siulittaasunngorlaaq, Inunnguaq Petrussen, paasissutissiivoq.
- Siulersuisunngorlaat maajip qulingani ataatsimeeqatigiissapput, tassani siunissamut pilersaarutit inissinneqassallutik, Inunnguaq Petrussen, Sermitsiaq.AG-mut oqarpoq.
Kalaallit nipilersornernikkut inuiaqatigiinnut qanoq sunniuteqartarneranik annertuumik misissuisoqarnissaa pisaqariaqartoq, taanna oqarpoq. Suliassarli politikkikkut ikiorneqarluni misissuisoqarnissaa ingerlanneqassaaq.
- Kalaallit nipilersortartut nittartakkat nipilersornikkut kiffartuussisunit unammillerneqarput. Nittartakkatsigut kiffartuussiiviit unammillernissaannut aningaasatigut unammilleruminaappoq, Nunarpummi mikisuararsuuvoq. CD-nik saqqummersitsisarnik tuniniaasarnerillu annikilliartuinnartut, radiomilu kalaallit nipilersortartui sammineqarnerulernissaannik ujartuilluni, siulittaasoq paasissutissiivoq,
Politikkikkut ilisimasaqarneq
Kattuffik ukiorpaalunni unittooqqasimasoq piffissami kingullerni bookingsbureau-tut ilinniaqqiffittulli atorneqarsimavoq. Nipilersortartut kattuffik sunngiffimmi sammineqaannarani politikkikkut akulerutsinneqassasoq pilersaarutaalerpoq.
- Kalaallit nipilersortartuisa isumaqassusaat politikkikkut ilisimaneqalernissaat kissaatigaarput. Misissuineq naammasseriarpat nipilersortartunut 150-nut Nunatsinnilu nipilersornikkut peqatigiiffiit siunissami suut piviusorsiortumik suliarineqarsinnaanerat paasinarsiumaarpoq, siulittaasunngorlaaq oqarpoq.
Siulittaasut
- Siulittaasoq Inunnguaq Petrussen
- Siulittaasup tullia Jonas Fleischer
- Ilaasortaq Leif Saandvig Immanuelsen
- Ilaasortaq Nukannguaq Geisler
- Ilaasortaq Eigil Petersen
- Sinniisussaq Minik Frederiksen
- Sinniisussaq Isak Josenius