Kalaallit nerisassanik avammut tunisinerannut ataatsimeersuarneq aallarnisaassaaq

Nerisassat Kalaallit Nunaanneersut nioqqutissat nukittuunngorlugit ineriartortinneqassapput.

Ataatsimeersuarnerup 'The Greenland Label – Quality Food from the Arctic'-ip taamatut ineriartornissamik anguniagaqarneq aallarnisassassavaa.

Saqqummerneq amigaataasoq
Ataatsimeersuarnimik aaqqissuisup Arctic Business Councilip oqaatigaa, suliffeqarfiit minnerusut ukiuni makkunani kalaallit nerisassaataannik nutaanik ineriartortitsisut.

- Taamaattorli avammut tuniniaavinni annertuumik ilisimaneqalernissaq suli amigaatsigaarput, taassuma saniatigut Kalaallit Nunaat nerisassanik tunisassanik amerlasoorpassuarnik eqqussuiuarpoq ilaatigut Qallunaat Nunaannit, ataatsimeersuarnermut qaaqqusissummi ilaatigut tamanna allaqqavoq.

Suliffeqarfeeqqat nutaaliortut
Ataatsimiinnermi najukkami niuernerup qanoq nukittorsarneqarsinnaanera oqaluuserineqassaaq, saniatigullu avammut niuernerup ammarneqarnissaa.

Suliffeqarfiit minnerusut arlallit, soorlu Maki Seaweed, Greenland Foods, Arctic Green aamma Lilleholm ataatsimeersuarnermut peqataassapput, misilittakkatik aamma aporfigisatik oqaluuserissallugit.

Tassami piffissaq tulluartuusoq Arctic Business Councilip nalilerpaa.

- Ukiut kingulliit ingerlaneranni suliffeqarfiit minnerusut nutaat arlallit takkussimapput, taakku pimoorussillutik angusassamillu toraagaqarlutik tunisassianik nutaanik ineriartortitsillutik suliaqarput, qaaqqusissummi tamanna allaqqavoq.

Raajat ammaassisuussapput
Aalisarnerup iluani raajat tusaamaneqarluarnerat aalisakkanik nioqqutinik allanut nutaanut ammaassinermut atorneqassapput. Ilaatigut Island qanoq isumassarsiorfigalugu aalisagaq tamaat atorlugu nioqqutissiortoqarsinnaanera oqallisigineqassaaq.

Ataatsimeersuarneq pingasunngornermi marsip 22-anni nalunaaqutaq 8.00-17.00 Ilisimatusarfimmi pissaaq.