se billeder
Kalaallit musketeret ajugaaqqipput
Aarhusimi 2.000-ingajannik isiginnaartoqarluni tallimanngormat unnukkut GOG Håndboldliga-mi ajugaaqqippoq sulilu siuttuulluni
Akutaaneq Kreutzmann, Minik Dahl Høegh Jakob Larsenilu tamarmik pisooqataalluinnarput fynimiut ajugaajuaannangajattunut Århus Håndbold-imut 34-28-mik ajugaanerannut. Århus-imiut siorna pokalinnanniunnermi pissartaapput Håndboldliga-milu siuttunut ilaajuaannarlutik. GOG Håndboldliga-mi nutaajuvoq, unammisartorpassuilu Danmarkimi assammik arsartartut kakkannersaanni unamminngisaannarsimapput, unammisartuilu misilittagaqarnerpaat marluk Kasper Jørgensen islandimiulu Snorri Gudjonsson ajoquteqarlutik unammeqataaneq ajorput.
GOG pisarnermisut aallartilluaqaaq. 8-2-mik siuapallapput, Århus tulleriiginnarnik arfinilinnik isertitsilluni pissangatitseqqilinnginnerani. GOG sukaqqippoq, muminnermilu arfinilinnik siuarsimalluni 17-11-mik. Pingaartumik Akutaaneq Kreutzmann unamminerup immikkoortuani siullermi isertitseriallaqqeqaaq.
Århus Håndbold unamminerup immikkoortuata aappaani suut tamaasa atorlugit uterniarrsarigaluartut, holdi tusaamasamit Erik Veje Rasmussenimit, Danmark sinnerlugu 233-eriarluni unammisarsimasumit, sungiusarneqartoq, tupaallannartumik NRGI Arena-mi kakkannerni unammisalerlaanit ajorsartinneqarpoq.
Minik Dahl Høegh unamminerit tamaasa siuariartorpoq. Tuivimigulli annertuumik pilatsinnermi kingorna Minik Dahl Høegh saassussinerinnarmi atorneqartarpoq.
Kalaallit qulingiluanik isertitsipput
Kalaallit musketerit pingasut Akutaaneq Kreutzmannip, Minik Dahl Høeghip Jakob Larsenillu kalaallit assammik arsartui pitsaanerpaamik takuteqqippaat. Akutaaneq Kreutzmann tallimariarluni isertitsivoq Minik Dahl Høegh sisamariarluni, bænkimillu Jakob Larsenip unammineq qularnaatsumik aquppaa.
– Unammilluartorujussuuvugut. Taktikkerput malipparput, tamarmillu sapinngisartik tamaat ikiuupput. Stregimiinneq qaffasissorujussuuvoq taavalu sunit tamanit isertitsisarpugut. Unammisartuvut qulingiluat isertitsipput. Taamaattumik ingerlaqqinnissatsinnut qilanaarpugut, Jakob Larsen unamminerup kingorna Sermitsiaq.AG-mut oqarpoq.
Aqqaluk Sørensen
Aarhusimi ´kalaallit unnuat´ suli annertunerusinnaagaluarpoq. Århus Håndboldimi unammisartut ilagaat nunanut allanut unammisartoq Aqqaluk Sørensen, taannalu siorna seeqqumigut annertuumik pilatsinnermi kingorna sivisuumik unammisimanngilaq.
Århus Håndbold-imi sungiusaasup ikiortaa Peter Bredal Sermitsiaq.AG-mut oqaluttuarpoq Aqqaluk Sørensenip seeqquva scanneqqinneqarsimasoq, paasiniarlugu sooq pullattuaannarnersoq. Scannernerata inernera suli pissarsiarineqarsimanngilaq.