erinaq minguitsoq
Kalaallit meeqqat Julie erinarsoqatigissavaat
Asimi illoqarfimmilu eqqiluisaarnissaq pillugu paasititsiniaanermi erinarsuut immiunneqassaaq
Nuummi Nuussuup Atuarfiani aamma Maniitsumi Kilaaseeqqap Atuarfiani atuartut erinarsuut ’Qujanaq’ tamassa sungiusaruttulerpaat. Erinarsuut taanna pinngortitamik paarsilluarnissamut eqqaavinnillu atuinerunissamut paasititsiniutaavoq aamma videotut immiunneqartussaq.
Namminersorlutik oqartussat kaammattuutigaat eqqaaviit atorneqarnerussasut aammalu eqqakkat illoqarfimmi asimilu inissittarnissaat eqqarsaatigilluagaanerussasoq. Nipilersornermik ilinniartitsisoq Per Rosing popimik erinarsuusiorsimavoq taaguuserlugu ’Qujanaq’ taannalu Nuummi Nuussuup Atuarfiani Maniitsumilu Kilaaseeqqap Atuarfiani atuartut uani sapaatip akunnerani sapaatip akunneranilu tullermi sungiusassavaat. Julie Berthelsenip erinarsuut meeqqat peqatigalugit erinarsussavaa aamma nipilersukkamut video Nuummi Maniitsumilu immiunneqassaaq.
Ernerata ikiorpaa
- Julie Berthelsenip kissaatigisimavaa Nuussuup Atuarfiani atuartut peqataanissaat nammineq tassani atuartuusimagami, Per Rosing Sermitsiaq.AG-mut oqarpoq.
Erinarsuutip taallaa qujaniarneruvoq inunnut eqqaavimmik atuilluartunut meeqqanut inuusuttuaqqanullu saaffiginnittuulluni.
- Tamanna pissutigalugu ernera ikiortigisimavara taallap oqaasertaa oqaatsinik meeqqat inuusuttuaqqallu atortagaannik atuiniassagatta, Per Rosing oqarpoq.
Julie Berthelsen sapaatip akunnerani tullermi Nuussuup Atuarfianukassaaq meeqqat sungiusaqatigissallugit tamatumalu kingorna video Nuup qeqqani immiunneqassaaq. Aamma Maniitsuliassaaq tassani erinarsortoqarlunilu videomut immiussisoqassaaq.
Erinarsut KNR radiomi tv-milu appisimaarneqartassaaq tassanilu illoqarfimmi asimilu eqqiluisaarnissaq qitiuvoq.