film
Kalaallit kinaassusaannik filmeeraliaq 3.000-t sinnerlugit takuneqarpoq
Naalagaaffeqatigiinni inuusuttut kinaassutsiminnik annikilliuutaat pillugit Aka Hansenip filmeeraliaa Half & Half nuannarineqarlualersimavoq
Ulluni makkunani, Saammaateqatigiinnermut Isumasioqatigiissitaliaq nuna tamakkerlugu innuttaasunik ataatsimiititseqattaaleruttortoq, filmeeraliaq ukiumik ataatsimik pisoqaassusilik nettimi nuannarineqaleriataartorujussuanngorsimavoq.
Aka Hansenip, Nunatsinni Danmarkimilu arlalinnik filmiliortarsimasup maannalu Københavnimi filmiliornermik ilinniagaqartup, kalaallit kinaassusaannik nammineq isiginninnerminik filmeeraliani tamanut saqqummiussimavaa.
Kalaallit assigiinngitsorpassuit
Matuma allannerani filmeeraliaq, allaaserisap ataani takusinnaasat, 3.100-nit takuneqarsimavoq.
– 2014-imi filmfestivalip Greenland Eyes ingerlanneqarnerani ataatsimeersuarnermut atatillugu ´Half & Half´ sananeqarpoq, ataatsimeersuarnermilu panelimi peqataavunga. Danmarkip Kalaallit Nunaatalu akornanni saammaateqatigiinnissaq oqaluuserisimavarput. oqallinnermilu oqarpunga eqqaamassagipput Kalaallit Nunaannut Danmarkimullu attuumassuteqartut amerlaqisugut, tassaagattami taaneqartartut affarmik affaq, Aka Hansen Sermitsiaq.AG-mut oqarpoq.
Filmimik immiussisuuvoq Ulannaq Ingemann.