EU puisip amialu
Kalaallit isumaqatissarsiorlutik angalanerminni Greenpeacemit tapersersorneqartut
Danskit kalaallillu politikkerii ulloq ataaseq Bruxellemut angalapput naggueqatigiit Inuit puisit amiinik tunisassiornerat EU-mit sukaterniarneqartoq allanngortinniarlugu sunniiniariartolutik. Siumut IA-llu tikeraarnertik pissarsiaqarfigilluarpaat
Kalaallit folketingimi ilaasortaatitaasa Bruxellesimi tikeraareernermi kingorna angusaqarluarsimanerarput.
Folketingip Kalaallit Nunaat pillugu Ataatsimiititaliaani Inatsisartuni ilaasortat peqatigalugit ulloq ataaseq Bruxellemut angalapput. Tassani naggueqatigiit Inuit puisit amiinik tunisassiornerat EU-mit sukaterniarneqartoq allanngortinniarlugu sunniiniariartolutik angalapput.
- Bruxellemi angalaneq isumalluarnartutut isigaara. Margrethe Vestageriinnaalluunniit ullumi twetterimi allataa, kalaallit puisinniartarnerat tapersersorlugu, ersersinneqaannarpoq angalanerpoq iluaqutaasimasoq. Aamma EU-parlamentimi oqaaseqartartut kiisalu qallunaat EUmi qinigaatitaat isumalluarnarput – minnerunngitsumik Greenpeace International puisinniartarnitsinnut tapersersuilluni allagaqarnerata kingornatigut, Doris Jakobsen tusagassiutinut nalunaarummi allappoq.
EU-parlamentemi oqaaseqartartoq naggueqatigiit Inuit puiainniartarnerannut sukateriniarluni kommissionip siunnersuutaa allannguutissamik siunnersuuteqarfigaa, tamannalu aqagu tallimanngornermi suliarineqassaaq.
Tapersersuisoqarnera IA-mit nuannaarutigineqarpoq
Naggueqatigiit Inuit puisit amiinik tunisassiornerat EUmit sukaterniarneqarnerat Inuit Ataqatigiinnit Johan Lund Olsenip aamma akerleraa.
- Kalaallit Nunaanni puisinniarnerup nungusaataanngitsumik ingerlanneqarneranik uumasullu pitsaasumik pineqarnissaannik ataqqinnilluarluni pisarneranik oqariartuupput anngupparput. Nuannaarutigivara WWF-ip Greenpeace-llu isummagut tapersersormatigit, aamma kalaallit danskillu naalakkersuisui suliami peqataalluarmata.
- Isumaqarpunga ikioqatigiinnitsigut puisinit nioqqutissiat Kalaallit Nunaanneersut aaqqiivigineqarnissaat qularnaarsinnaallugu. Puisinniarneq kalaallit kulturiata ilagaa, innuttaasut neqissaqarnissaannik ilaqutariippassuillu isertitaqarnissaannik qularnaarisoq. Pingaartuuvoq EU-p puisinniartarneq pillugu isummanik pigiliutiinnakkanik suli atuuttunik nungusaaqataanissamut ikiuunnissaaa, tassuunakkut puisit amii ilaqutariit kalaallit aningaasaqarniarnerannut iluaqutaaleqqullugit, Folketingip Kalaallit Nunaat pillugu Ataatsimiititaliaani siulittaasoq Johan Lund Olsen oqarpoq.