Kalaallit inuusuttut sakkutuussatut qinnuteqartikkusuppaat

Illersornissamut Qullersaqarfiup kalaallit arnat angutillu inuusuttut 17-iniit 26-nut ukiullit amerlanerit sakkutuunngorusullutik qinnuteqartartut amerlisikkusuppai.

Tamanna nunatsinni tusagassiuutit atorlugit paasisitsiniaanermik sapaatip akunnera una aallartippoq.

Taama Namminersorlutik Oqartussat tusagassiuutinut allapput.

Danskit illersornissamut ministeriat Nicolai Wammen naapertorlugu kalaallit inuusuttut amerlanerusut sakkutuunngortarnissaat ajunngitsumik siunertaqarpoq, pingaartumik sakkutuut Issittumi suliassat amerlasuut ingerlattagaat eqqarsaatigalugit.

- Kalaallit inuusuttut amerlanerusut sakkutuunngorniartarnissaat neriuutigaara. Pingaartumik Kalaallit Nunaanni, Atlantikup avannaanni issittumilu sakkutuutut suliassat pingaarutillit eqqarsaatigalugit, qallunaat illersornissamut ministeriat Nicolai Wammen Socialdemokraatineersoq taama oqarpoq.

Illoqarfiit paasisitsiniaavigineqartussat
Illersornissamut Qullersaqarfik Namminersorlutik Oqartussat suleqatigalugit maajip 26-aniit juunip qulingat ilanngullugu nunatsinni illoqarfinni anginerusuni immikkut toqqarneqarsimasuni arfineq marlunni inuusuttorpassuaqarfiusunilu Sakkutuut Ulluanik taallugu paasisitsiniaanernik ingerlatsiniarput.

Paasisitsiniaanerni taakkunani Illersornissamut Qullersaqarfik illoqarfinni pineqartuni timersortarfinnik eqaarsaartarfinnilluunniit attartortassaaq taakkunanilu illersornissamut tunngatillugu Issittumi suliaasartut, sakkutuunngorniarfinni ilinniarneqarsinnaasut aammalu sakkutuuni atorfeqarnissamut periarfissat paasisitsiniutigineqassapput. Kalaallit inuusuttut angutit arnallu oqaatsitigut timikkullu piginnaasaat aamma misiligarneqartassasut, Namminersorlutik Oqartussat ilisimatitsipput.

Paasisitsiniaanerit ukunani ingerlanneqassapput:

Qaqortoq: 26. maj
Tasiilaq: 28. maj
Nuuk: 1. aamma 2. juni
Sisimiut: 4. juni
Aasiaat: 6. juni
Ilulissat: 8. juni
Upernavik: 10. juni