arsaalluni piukkunnaatillit
Kalaallit inuusuttut Danmarkimi najugallit arsaannermik piukkunnaatillit sungiusartinneqassapput
Kalaallit inuusuttut arsaattartut Danmarkimi najugallit poorskikkunni piukkunnaatilittut sungiusaqatigiisinneqassapput
Kalaallit inuusuttut 25-it 16-iniit 19-inut ukiullit arsaannermik piukkunnaatillit ilinniagaqarlutik Danmarkimi sumi tamaani najugaqarput. Tamarmik arsaannermik soqutigisaqarput, poorskikkunnilu Fynip kujataani Tåsinge-mi katersuutsinneqassapput, tassani apriilip aallaqqaataanit 6-annut Svendborg Sund Camping-imi najugaqassallutik.
Piukkunnaatilinnik sungiusaqatigiissitsineq aaqqissuunneqarpoq GBU-mit, Kalaallit Nunaanni Arsaattartut Kattuffiannit, GBU-llu Danmarkimiitaata Jørgen Peter Poulsenp taamatut aaqqissuussinermi pisariaqartut assigiinngitsorpassuit isumagissavai.
Sungiusaqatigiissitsinermi sungiusaasuussapput nunanut allanut unammisartut sungiusaasuat René Olsen, Tekle Ghebrelul aamma Kent Nielsen. Inuusuttut arsaannermik piukkunnaatillit futsal-imik ulluni siullerni pingasuni illup iluani sungiusartinneqassapput, ullunilu kingullerni pingasuni silami sungiusartinneqassallutik.
Elite Sport Greenland peqataassaaq
Jørgen Peter Poulsen Sermitsiaq.AG-mut oqaluttuarpoq nalinginnaasumik sungiusarnerup saniatigut Tåsinge Boldklub, Fynsseriami unammisartoq, isumaqatigiissuteqarfigineqarsimasoq silami sungiusaatigalugu unamminissamik. Pilersaarutaavoq unammineq poorskimi ingerlanneqassasoq.
– Futsal-imik sungiusaatigalugu unamminissamut akerassanik nassaaruminaatsitsisimavugut. Futsa Danmarkimi ukiukkut timersuutaavoq, futsal-ertartullu unammiffimmi ivikkanik qallikkami unammisalersimapput.
Jørgen Peter Poulsenip iluarsimaarluarlugu oqaluttuaraa inuit pingasut unammisartunut nerisassiornermi piumassutsiminnik ikiuukkusuttut takkussimasut. Unammisartut camping-imi illuaqqani najugaqassapput, nerisassallu sassaalliutigineranni tamarmik ikioqatigiittassapput.
Arsaannerinnavik sammineqassanngimmat peqatigiinnissanik aaqqissuussisoqassaaq, suli inissivinneqarsimanngitsunik.
Elite Sport Greenlandip siulittaasua Finn Meinel sungiusaqatigiinnermut ornigunniarluni nalunaarsimavoq. Taamatut sungiusaqatigiissitsineq siusinnerusukkut Frederikshavnimi ingerlanneqarsimavoq.