Kalaallit imiannik millionillit nalinginut peqquserlunneq

Danmarkimi peqquserlunneq Kalaallit Nunaannut attuumassuteqarpoq.

Qallunaammi eqqartuussissuserisut, Johan Schlüter, Lars Halgreen aamma Susanne Fryland sullissaminnut peqquserluttuliortutut unnerluunneqarput.

Eqqartuussissuserisut Jyllands-Posten, suliamik paasiniaasimasoq, malillugu naleqartuusaartitanik ingerlatsivinnut allanut nussuisarsimapput ilaatigut ingerlatsivimmut Aqua Green Holdingimut, Kalaallit Nunaanniit imermik avammut niueruteqarniartumut. Politiit paasiniaasartuisa oqarnerat malillugu eqqartuussissuserisut pingasut piginnittuussusitik Aqua Green Holdingimullu, nuliaasa piginneqataaffigisaannut, suliakkiissutitut isumaqatigiissut 2015-imi upernaakkut nuunneqarput.

Aqua Green Holding tuniniaanermut allagaatini North Atlantic Fresh Water Alliance-mik (NAFWA)-mik 25 procentimik piginneqataanerarpoq suliakkiissutitullu isumaqatigiissut tunngavigalugu NAFWA-p isertittaanit tamakkiisunit 3,33 procentimik pissarsisassalluni. Eqqartuussissuserisut tamatuma kingorna Aqua Green Holdingip NAFWA-mik piginneqataassutaa 28 millionit Eurolerlugu, 200 millionit koruunit sinnerlugit, nunami allamiumut tuniniaraluarlugit. Akia NAFWA-p imermik ukiumut 1 milliard kubikmeterisut initutigisumik tunisisarnissaa aallaavigalugu iluarsisaavoq.

NAFWA-lli siulittaasua, kukkunersiuisoq, Jan Richard, 4Audit Sisimiuneersup, Aqua Green Holding NAFWA-mik piginnittooqataanera eqqunngitsuunerarpaa allaallu suleqatigiit suliakkiissutinik isumaqatigiissuteqannginnerarlugit. Aamma NAFWA suli imermik avammut tunisisarluni aallartinngitsoq taamaallaalli misissueqqaarnissamut akuersissummik peqartoq tikkuarpaa. Inuussutissarsiornermut allanullu Naalakkersuisoqarfiup imermik nilannillu atuinissamik akuersissutinik tunniussisartup tamanna eqqortuunerarpaa.

Pinerlunneq pillugu allaaserisaq Sermitsiaq aviisimi kingullermi saqqummertumi atuaruk:

Sermitsiaq Uge 26 2017

Klik her for at læse