Katinnganeq
Kalaallit Illuutaat ataatsimut ilisarnaatitaassapput
Danmarkimi Kalaallit Illuutaat ataatsimut ilisarnaammik nutaaluinnarmik pisaarput
Kalaallit Illuutaasa ilisarnaataat nutaaq takussutissaqarlunilu oqaluttuassartaqarpoq, Danmarkimi Kalaallit Illuutaat tusagassiorfinnut nalunaarutikkut allapput.
Qalipaataa kalaallit erfalasuattut aappalaartuuvoq isikkualu, Kalaallit Nunaannut assingusoq, tassaavoq iluliaq imaaniittoq, misissorluaraannilu takuneqarsinnaavoq ilulissap qaava illumut assingusoq, kalaallit illuutaannut ilisarnaatitut, Kalaallit Nunaata Danmarkimiinneranik takutitsilluni.
Katinnganeq suleqatigiinnerlu
– Danmarkimi Kalaallit Illuutaat isumaqarmata nutaamik lisarnaatitaarnissamut piffissanngortoq, taamalu avammut assigiiaarnerusumik takutitsisumik, tamatumunnga pissutaavoq illut akornanni katinnganeq suleqatigiinnerlu erseqqissarusukkatsigu, tusagassiorfinnut nalunaarummi allassimavoq.
Illut sisamat, Københavnimi, Odensemi, Aarhusimi Aalborgimiittullu ataatsimoorussanik suliarpassuaqarput attaveqarlutillu, aammalu kalaallinik ilinniagaqartunik efterskolimilu atuartunik ilitsersuinermik, Danmarkimi kalaallinik innuttaasunik tikilluaqqusisarnermik siunnersuinermillu arlalitsigut suleqatigiipput kulturimillu takutitsisarlutik.
Ilisarnaat ataatsimoorussaq
– Ataatsimut ilisarnaateqarnissamik taamalu kinaassuseqarnermik aalajangerneq annertuujuvoq pingaaruteqarlunilu. Ilisarnaat nutaaq illuni tamani sisamani sivisuumik suliniuteqareersimalluni aalajangiunneqarpoq, Annette Bogø Lybertyh, Odensemi Kalaallit Illuutaanni kulturimut akisussaasoq pisortallu tullia paasissutissiivoq.
Suilassat ilagisimavaat ataatsimoorussamik takutitsilluni illut kinaassusaasa attatiinnarnissaat. Taamaattumik illut tamarmik ilisarnaataanni illoqarfik sumiiffik allassimavoq, tamannalu peqatigalugu ilisarnaatikkut illut kattunneqarput, qulequtserlugu Danmarkimi Kalaallit Illuutaat.
Ilisarnaat ilusilersorneqarsimavoq ilusilersuinermik ingerlatsivimmit Monokrom-imit.
Danmarkimi Kalaallit Illuutaasa ataatsimut ilisarnaataat ataani takujuk