Kalaallit Illuutaat
Kalaallit Illuinut aningaasaliussat tunniunneqalerput
Inuit Ataqatigiit Folketingimi ilaasortaatitaata Aaja Chemnitz Larsenip apeqquteqaataa tunngavigalugu Kalaallit Illuini akuunerulersitsiniarluni suliniuteqarnissamut aningaasaliussat maanna tunniunneqalerput
Danmarkimi Kalaallit Illuutaannut tunngatillugu nutaarsiassaqarpoq.
Akuunerulersitsinissamut suliniummut aningaasaliussat 4 million koruuninik naleqartut Kalaallit Illuutaannut tunniunneqalerput.
Aningaasat taakku sallerpaatillugu kalaallit ilinniagaqarlutik Danmarkimut noorlaat kalaallillu allat Danmarkimut nooqqammisut iluaqutigisussaavaat. Danmarkimi Kalaallit Illuisa paasiuminaatseqisaanik aningaasat tunniunniarneqapiloornikuupput.
Inuit Ataqatigiit tusagassiuutinut nalunaaruteqarput.
Folketingimut qinersineq
Januaarip aallaqqaataanit atuutilersussamik aningaasanik immikkoorsisoqarpoq, kisianni kalaallit illuisa aningaasat tigunissaat assut ajornakusoortissimavaat. IA Folketingimi kingullermik maaji qaammat Isumaginninnermut Ministerimik ataatsimeeqateqarpoq, aningaasat tunniunneqarnissaat siunertaralugu, iluatsitsiffiunngitsumilli, ilaatigut Folketingimut qinersisoqarnera pissutigalugu.
Danmarkimut ilinniariartortunut aningaasaliunneqartut iluaqutaasartut Aaja Chemnitz Larsen oqarpoq:
- Soorunami nuannaarutigivara immikkut aningaasaliissutit pineqartut pissarsiarisinnaagatsigit, ilinniartut akornanni pinaveersaartitsilluni suliniuteqarnissamut atorneqartussat, taamatullu kalaallinut Danmarkimut noorlaanut iluamik paasitsiniaanissamut tikilluaqqusinissamullu atorneqassallutik. Inuit arlallit kulturimut allamut nuunneq annertuumik unamminartoqartutut misigisarpaat, oqaatsinillu ajornartorsiuteqarneq misigisarlugu, taamaammat aningaasaliussat atorfissaqartinneqaqaat.
Ataavartumik sullissineq
Aningaasat piffissaq eqqorlugu tunniunneqarsimannginnerat Aaja Chemnitz Larsenip isornartorsiorpaa.
- Kissaatiginaraluaqaaq maanna misilittagaqalereersimanissarput, tassami soorunami neriuutigivara suliniut iluatsissasoq, ataavarnerusumillu akuunerulersitsiniarluni suliniuteqartoqartarnissaa sulissutigissavara, IA-mi politikkeri oqarpoq.