Kalaallit ilinniartut taamaatitsinnaartarnerat annikillisarneqassaaq

Aahus Universitetimi misiliutitut suliniutip kalaallit Danmarkimi ilinniakkamik taamaatitsiinnartarnerat qanoq annikillisarneqarsinnaanera takutissavaa

Kalaallit ilinniartut arlallit danskinut sanillersuullugit Danmarkimi ilinniakkamik naammassiniapiloornerusarput. Tamannalu iliuuseqarfigineqassasoq, ilinniartitaanermut ilisimatusarnermullu minisiteri Tommy Ahlers (V) Folketingimi Kalaallit Nunaat pillugu ataatsimiitaliap ammasumik isumasioqatigiinnerani oqaatigaa.

Danskit naalakkersuisuisa Naalakkersuisut suleqatigalugit kalaallit danskit ilinniarfiinut ikaarsaariartarnerat qanoq oqilisaavigineqarniarnerat pillugu Aaja Chemnitz Larsen (IA) ministerimut apeqquteqarpoq.

Kisitsillu ersarilluinnarpoq – kalaallit Danmarkimi ilinniartut ukiumi siullermi 27 procentii tamaatitsiinnartarput. Danskinullu kisitsit 16 procentiuvoq.

Ilinniartitaanermut ilisimatusarnermullu ministerip Tommy Ahlersip (V) ajornartorsiut pimoorullugu arlariarluni erseqqissaassutigaa.

Annernassaaq, taamaakkaluartoq Kalaallit Nunaaninngaanneersuuneq pissutigiinnarlugu annernarnerussanngilaq.

Misiliutitut suliniut

Aarhus Universtitetip Aarhusimi Kalaallit Illuat suleqatigalugu misiliutitut suliniut aallartinneqaqqammertoq taassuma iliuuseqarfigisassat ilaattut tikkuarpaa. Suliniummi iliuutsit assigiinngitsut inuusuttunut misiliutigineqassapput. Suullu iluatsinnersut paasiniarnerani ilinniartut 14-it malinnaavigineqassapput. Tassani misilittagarilersimasat Danmarkimi ilinniarfinnut allanut siammarterneqassapput.

Pissutaasunik misissuineq

Tommy Ahlersillu (V) upernaamut inuusuttut suna pissutigalugu taamaatitsiinnartarnerat misissuiffiginiarpaa.

- Annernassaaq, taamaakkaluartoq Kalaallit Nunaaninngaanneersuuneq pissutigiinnarlugu annernarnerussanngilaq, ministeri erseqqissaavoq.

Oqaatsit, kulturi, ineqarneq ajornartorsiutillu pissutaasinnaaneri isumasioqatigiinnermi tikkuarneqarput. Apersuilluni misissuinikkut inuusuttut suut pissutigalugit ilinniakkamik taamaatitsiinnartarnerat paasiniarneqassaaq.

Powered by Labrador CMS