Kalaallit ikinnerussutilittut oqallisigalugit
Naalagaaffeqatigiinnerup iluani ikinnerussuteqarneq pillugu oqallinnissamut Nauja Lynge qaaqqusivoq.
Maajip aappaanni panelip oqallittut, kalaallit naalagaaffeqatigiinnermi ikinnerussuteqartutut piginnaatitaaffitik qanoq qulakkeersinnaaneraat oqallisigissavaat. Oqallissaarisartoq aamma atuakkiortoq Nauja Lynge, nammineq atuakkiani ‘Jeg er Nauja’ aallaavigalugu qallinnissamut qaaqqusisuuvoq. Atuagaq aallaavigalugu panelimiittut kalaallit danskillu kinaassusaat naalagaaffeqatigiinnermi qanoq ataatsimuulersinneqarsinnaanersoq oqallisigissavaat.
Panelimi peqataassapput inuiaqatigiilerinermi ilisimatusartoq Aki Høegh-Dam, Folketingimi Nunarput pillugu ataatsimiititaliami ilaasortaq Karsten Hønge (SF), kontreadmiraliusimasoq aamma umiarsuit usissaannik isumaginnittuusimasoq Torben Ørting Jørgensen, historikeri aamma Ilisimatusarfimmi adjunktiusimasoq Jens Wendel Hansen kiisalu atuakkiortoq tusagassiortorlu Else Lidegaard.
Professor Thomas Werge kalaallit ajortumik isigineqartarnerat pillugu ilanngutassiissaaq.