Paris
Kalaallit Frankrigimi immiusseqataasut
Ilulissani Naleqqami nalaatsornerinnarmik naapinneq kalaallit nipilersortartut pingasut nunani tamalaani saqqummersussamut immiusseqataanerannik kinguneqarpoq
Nipilersortartup Frankrigimeersup Francis Lalannep ukioq manna siusinnerusukkut Ilulissaniilluni nipilersortartut pingasut, guitarertartoq Viila Sandgreen, pattattartoq Marius Sandgreen aamma erinarsortartoq Tuperna Kruse, nalaatsornerinnarmik Naleqqami naapippai.
Francis Lalanne nipilersortartut taakkua pingasut Ilulissaneersut Aasianneersut nunani tamalaani saqqummersussamut immiussinissaminut nipilersortartunik peqataasinnaasunik nunarsuaq tamakkerlugu ujaasinermini naammattoorpai.
Tamatuma kingorna Francis Lalannep nipilersortartut taakkua pingasut Parisimi immiussisarfimminut tikeraarsarpai immiussitikkiartorlugit. Saqqummersitassamini nipilersortartut allat USA-meersut, Africameersut, Indiameersut aamma Kinameersut nipilersukkani assigiinngitsuni aqqaneq marlunni nunani tamalaani saqqummersussami ilaatinniarpai.
Atuaruk: Franskeq tusaamasaq kalaallinik nipilersoqateqassaaq
Kalaallit nipilersortartut immiussereerput
Nipilersortartullu taakkua pingasut Ilulissaneerlutillu Aasianneersut taallaq, ’Suli avunga’ Fransis Lalannep Parisimi immiussisarfiani maanna immiutereersimalerpaat. Taallaq Fransis Lalannep nunatsinniinnermini taalliaraa. Pilersaarutaavoq taanna kalaallisut aamma franskisut saqqummersinneqarnissaa.
Francis Lalannep naatsorsuutigaa nunani tamalaani saqqummersinneqartussatut suliani aappaagu saqqummersinneqarnissaa, saqqummersitassaq taanna aamma musikvideotaqartussaavoq.
- Naatsorsuutigivara aappaagu saqqummersinneqarnissaa. Kalaallit Nunaannut uteqqissaanga saqqummersitassap musikvideotassaanik suliaqariartorlunga, saqqummersitassap nunani tamalaani saqqummersinneqannginnerani, Francis Lalanne Sermitsiaq.AG-mut ukioq manna siusinnerusukkut taama oqarpoq.
Francis Lalanne 1979-mi saqqummersitseqqaarnermi kingornali nuutinik 22 millioninik tunisaqareernikuuvoq.
Francis Lalanne uani videomi takuneqarsinnaavoq
Assit allaaserisap ataani aamma takukkit