Kalaallit filmiliaat Torontomi takutinneqassapput

Filmiliortartut peqatigiiffiat FILM.GL, imagineNATIVE Film + Media Arts Festivalimut, sapaatip akunnerata tulliani Torontomi ingerlanneqartussamut, kalaallit filmiliaannik takutitassanik katiterisimavoq.

Festivali nunarsuarmi nunat inoqqaavisa festivalertarnerisa annersaraat, kalaallillu filmiliortartut arfineq-pingasut kalaallit filmiliaannik takutitsiartorlutik canadap illoqarfissuanut aallarput.

Filmit qulingiluat
Festivalimi immikkut programmimi ´Greenland Spotlight´-imi sapaatip akunnerani tullermi kalaallit filmiliaat katillugit qulingiluat takutinneqassapput.

Filmit naatsut, filmit aliikkutassiat, filmit pisoqqat nutaallu, filminillu takutitsinerup saniatigut kalaallit filmiliaat sammitinneqassapput oqallitsitsinikkut, takutitsinikkut pisoqartitsinikkullu.

Nutaarpassuit
– Ukiuni kingullerni takusimavarput kalaallit filmiliarpassui nutaat filmiliortartullu nutaat saqqummerartut. Filmiliortartuupput tamarmik naggueqatigiinnik inunnik tunuliaqutallit, tamarmillu Kalaallit Nunaata ilisimasaqarneranik siammarsaaqataaginnaratik aamma kalaallit oqaluttuariaasitoqaannik, siusinnerusukkut filmimi takusimanngisatsinnik, siammarsaapput. Neriuppugut ukioq manna Greenland Spotlight aqqutigalugu amerlanerusut filmiliortartut nutaat maluginiarumaaraat, imagineNATIVE-mi Artistic Director Jason Ryle tusagassiorfinnut nalunaarutikkut erseqqissaavoq.

SUME-kunnik filmiliaq ilaavoq
Filmi piviusulersaarut ´SUME - Mumisitsinerup Nipaa´, 2014-imi imagineNATIVE-mi marlunnik nersornaaserneqartoq, festivalimi takuteqqinneqassaaq, Ujarneq Fleischerillu filmiliaqqaava ´Tikeq, Qiterleq, Mikileraq, Eqeqqoq´, 2008-mi 500 koruunit atorlugit filmiliarisimasaa, kalaallit aliikkutassiaralugu filmiliaattut siullertut takutinneqassaaq.

Tamatuma saniatigut filmit naatsut takutinneqassapput makkunannga filmiliat Aka Hansen, Ulannaq Ingemann, Inuk Silis Høegh aamma Kaare Sylvest Pedersen, kingulliullu naatsumik filmiliaa ´Qivittoq´ festivalimi takuteqqaarneqassaaq.

Festivalip ulluani kingullermi kalaallit filmiliortarneranni qanga pisimasut, ullumikkut pisut pingaartumillu siunissami pisussat oqallitsitsinikkut oqaluuserineqassapput.

Filminut nersornaatit
imagineNATIVE Film + Media Arts Festival 2016 pingasunngornermi oktobarip 19-ianni aallartissaaq sapaallu oktobarip 23-at ilanngullugu ingerlassalluni.

Tallimanngornermi oktobarip 21-anni kalaallit ilassinnissapput takutitsisoralugit Ujarneq Fleischer aamma Nukâka Coster-Waldu, arfininngornermilu oktobarip 22-anni nersornaatinik agguaasoqassaaq, tamatumanilu kalaallit filmiliaat arlallit nersornaasigassatut innersuunneqarsimapput.