erinarsoqatigiit
Kalaallit erinarsoqatigiit Jyllandimi tusarnaartitsisut
Erinarsoqatigiit aamma nipilersortartut Kujataaneersut uani sapaatip-akunnerani Region Midtjyllandimi aaqqissuussinerni assigiinngitsunik tusarnaartitsipput.
Talittarfimmutm illunut portusuunut aamma qilammut isikkivilerluni kalaallit erinarsoqatigiit 20-t kalaallisoortut arlalinnik erinalerlutik erinarsorput.
Takkuttorpassuit
Aarhusimi Dokk1-imi tamanna pivoq, taanna atuakkanik atorniartarfik nutaajuvoq illoqarfiup tulluusimaarutaa. Ullumikkut inuppassuit kalaallit tusarnaarniarlugit takkupput, taakku Kalaallit Illuutaat aamma Kulturby 2017 suleqatigalugit erinarsoqatigiit tusarnaartitsiniarput.
Erinarsoqatigiit marluk aamma nipillersortartut marluk Qaqortumeersut aamma Narsameersut, Kujallermi Nunatsinni Aarhusip kommuniata ikinngutaanut taakku ilaapput. Tassanilu ataatsimoorluni erinarsoqatigiinnermik nipilersornermillu Danmarkimi soqutiginnittunut avitseqateqarneq ileqqorineqarpoq.
Tusarnaartitsinerit arlallit
Sapaatip-akunnerata ingerlanerani Aarhusimi, Videbæk aamma Hvide Sandemi tusarnaartitsisoqarpoq. Taakku Aarhusimi Sydhavnenimi aaqqissuussaq Anersaaq peqataaffigaat, unnuk ataaseq Kalaallit Illuutaanni aamma Nordisk Sprogfestimi Godsbanenimi Aarhusimi tusarnaartitsillutik.
Aaqqissuussinernit assit uani ataani takukkit