inuussutissarsiorneq
Kalaallit danskillu suleqatigiinnerulernissaat Rosingimit siunnersuutigineqarpoq
Ernup nukinganik periarfissaasinnaasut inuussutissarsiornerullu pitsaanerulernissaanut aningaasaateqarfiliortoqarsinnaanera sulissutigineqarsinnaasoq Minik Rosingip periarfissatut isigaa
- Inatsisartunut qinersisoqareerpat ingerlaannartumik partiit, inuussutissarsiornermut kattuffiit pensionskassellu ataatsimoorlutik Kalaallit Nunaanni siuarsaanissamut periarfissamut ataatsimoorlutik ujartuilertariaqarput. Inuussutissarsiutit siuarsarneqartariaqarput amerlisarlugillu. Ernup nukinganik periarfissaasinnaasut inuussutissarsiornerullu pitsaanerulernissaanut aningaasaateqarfiliortoqarsinnaanera sulissutigineqarsinnaavoq kalaallit danskillu suleqatigiinnerisigut.
Statens Naturhistoriske Museumimi Københavns Universitetip ataaniittumi geologimi professori Minik Rosing Berlinskemi kronikkimik allappoq.
Kalaallit danskillu naalakkersuisuisa suleqatigiinnerulernissaat ujartorpaa, tassani inuussutissarsiutit kiisalu Kalaallit Nunaata aningaasaqarnerata pitsaanerusumik ingerlalernissaa anguniarlugu.
- Kalaallit Nunaanni periarfissat atorluarneqarsinnaanerupput. Aatsitassarsiornermi, inuussutissarsiornermi, takornarialerinermi kiisalu ataavartumik nukissiutini. Soorlu nunani allani assingusuni aningaasaliisoqarnissaa pingaaruteqarluinnartuuvoq ineriartortitsisoqassappat. Siuarsaanermi innuttaasut atorneqartariaqarput taamaasilluni akissarsiarineqartut akileraarnikkut aamma isertitaqaataaniassammata. Kalaallit Nunaanni taamatut siuarsaasinnaasunik amigaateqartoqarpoq, Minik Rosing allappoq.
Minik Rosingip allataa tamaat uani atuarneqarsinnaavoq