Danmark
Kalaallit arnat atugarliortut inuiaqatigiit naqqanut pisarput
Danmarkimi kalaallit arnat inuuniarnermikkut atugarliortut pillugit nalunaarusiaq Rådet for Socialt Udsattemit suliarineqarpoq, siunnersuisooqatigiinnilu tassani siulittaasup, Jann Sjursenip, tamanna 'nikallornartutut' oqaatigaa
- Taamaattussaanera salluuneranik isumaqarnarpoq. Eqimattat killeqartut sumiginnarneqartarput.
Nalunaarusiaq kalaallinik arnanik 22-nik aamma isumaginninnermik suliaqartunik arlalinnik apersuinermik aallaaveqartoq pillugu, Jann Sjursen, qallunaat aviisiannut Politikenimut oqarpoq.
Arnanut atornerluinerit
Arnat taakku amerlasuut atornerluinermik, nakuusernermik aamma kinguuaassiutitigut atornerlugaanernik ajoqusernermik kingunerlutsitsisuupput, tamaatut atugaqarneq aamma Danmarkimi ingerlaqqittarpoq.
Pisariaqartittutut misiginertik pissutigalugu ilaat qallunaamik aappaqarlutik Danmarkimukartarput, taamaattumillu tassaniiginnartarlutik naak nakuuserfigineqartarlutik atornerlunneqartaraluarlutik. Ilaat siniffissaqarniarlutik atoqateqarumasarput, ilaasalu oqaluttuaraat angerlarsimaffeqanngitsut unnuisarfiini atornerlunneqartarnertik.
Kommunimi systemi
Arnat nalunaarusiamiittut kommunimi systemi ikiortitut misiginngikkaat, tamatumali killormoortorigaa, aviisip allappoq. Kommunini itigartinneqartutut misigipput, taakku aningaasanik ikiorneqarput, paasitinneqaratillu ikiorneqarnissamillu pinngitsoortarput. Ikinnerpaallu tikikkaangamik oqaatsitigut pikkorissartarput.
Politikkikkut kalaallit inuuniarnermikkut atugarliortut ukkatarineqarnikuugaluarput. Eqimattat naalakkersuinikkut tunngavimmik isumaqatigiissutaasumi taakkartorneqarpoq, 2013-imiillu kalaallit pillugit iliuusissanut 13,4 millionit koruuninik immikkut illikartitsisoqarnikuuvoq.
Atuaruk: Ilisimatuut: Kalaallit nunasisutut pisinnaatitaaffeqalerlik
Kulturi allaanerusoq
- Maani kulturi allaaneruvoq, arnat qallunaatut oqaluttuunngikkajupput, systemit paasisinnaanngilaat aamma aningaaserivinni kontoqanngillat NemID-eqaratillu. Isumaqartarput sukkasuumik suliffittaarsinnaallutik angerlarsimaffittaarsinnaallutillu, kisianni ajornaatsuinnaanngilaq, Kalaallit Nunaannilu ilinniarsimagaluarlutik, Danmarkimi tamanna akuerisaanngilaq.
- Silarsuaq allaqqinnaajuvoq, pingaartuuvorlu kalaallisut oqalussinnaasumik sulisoqarnissarput, Bettina Bach, Københavnimi Redenimi aqutsisoq, Politikenimut oqarpoq.