Danmark
Kalaallit arnat 50-eriaammik angerlarsimaffeqannginnerusartut
Kalaallit arnat Danmarkimi inuuniarnermikkut ajornartorsiortut angerlarsimaffeqannginnermik 50-eriaammik eqqugaanerusarput, nalunaarusiap tamanna takutippaa
Ataasinngorpat marsip 14-ani 2016 folketingimi ilaasortaq Aaja Chemnitz Larsen (IA) susassaqarfinni sulisunik, politikerinik Christiansborgimilu soqutiginnittunik allanik ataatsimiisitsissaaq.
Kalaallit arnat inuuniarnermikkut ajornartorsiuteqalersinnaasutut inissisimasut pillugit ataatsimeersuartitsinissaq nalunaarusiamut ullormi tassani saqqummersussamut, ‘Danmarkimi kalaallit arnat inuuniarnermikkut ajornartorsiuteqalersinnaasutut inissisimasut’attuumassuteqarpoq.
Amerlanerusut
- Kalaallit Danmarkimi najugaqartut amerlanerit, tassa 58 procentiisa missaat arnaapput. Kalaallillu Danmarkimiittut 6 procentiisa missaat angerlarsimaffeqanngitsuunikuupput imaluunniit angerlarsimaffeqanngillat. Taakkualu Danmarkimi inuuniarnermikkut ajornartorsiuteqalersinnaasunut naleqqiullugit 50-eriaammik amerlanerupput. Kisitsisit taakkua tusaanngitsuusaaginnarsinnaanngilagut – Danmarkimi Kalaallit Nunaanniluunniit, Aaja Chemnitz Larsen tusagassiuutinut nalunaarummi oqarpoq.
Atuaruk: Aalborgimi kalaallit inuusuttut arlaqartut angerlarsimaffeqanngitsut
- Kalaallit Danmarkimiittut inuuniarnermikkullu ajornartorsiuteqalersinnaasutut inissisimasut sammineqarnissaannut pisariaqartitsisoqarpoq. Tigussaasumik suliniutissat saniatigut Kalaallit Nunaanni pinaveersaartitsinissamut iliuuseqartoqartariaqarpoq, taanna ilanngullugu oqarpoq.
Pilersaarut ataatsimoortoq neriuutigigaa
Arnat ajornartorsiuteqalersinnaasutut inissisimasut pillugit ataatsimeersuarnissap kiisalu kalaallit Danmarkimi najugaqartut pillugit tusarniaasitsinissap kalaallit Danmarkimi najugaqalersartut akuutinneqarnerulernissaannut tamakkiinerusumik pilersaarusiornissamut aqqutissiuisuussapput, IA-mi politikeri neriuuteqarpoq.
Atuaruk: Angerlarsimaffeqanngitsut akiliuteqartalernissaat siunnersuutigineqarpoq