Puerto Ricomi anngunniunneq

Kalaallit arnartaat normu 4-ranngorput

Kalaallit Nunaat Panamerikami pissartanngorniunnissamut anngunniunnerni Puerto Ricomi ingerlanneqartumi bronzennanniulluni USA-mut sapaammi unammigami ajorsarpoq

Kalaallit arnat assammik arsartartut nunanut allanut unammisartui bronzenanniunnermi målinik sisamanik USA-mut sapaammi ajorsarput

Kalaallit unammerup immikkoortuani siullermi 14-10-mik siuarsimariarlutik unamminerup naammassinerani USA-mut 27-23-mik ajorsarput.

- Unamminerup immikkoortua siulleq iluarisimaarpara. Assersuisugut pissusissamisut illersuipput, saassussisarnivullu minutsit kingulliit 15-it tikillugit ajunngitsumik ingerlallutik, nunanut allanut unammisartut sungiusaasuata ikiortaa, Johannes Groth oqarpoq.

Nangipporlu:

- Unamminerup immikkoortuata aappaani Najaaja Lyberth paarineqalerpoq, taamaakkaluartorlu aamma saassussinissatsinnut periarfissinneqartarnivut amerlasoorpassuit asuliinnartittarpagut.

Atuaruk: Arnat assammik arsartartut Cubamit ajorsartinneqarput

Johannes Grothip ilanngullugu oqaluttuaraa arnat assammik arsartuisa nunanut allanut unammisartuisa Panamerikami pissartanngorniunnissamut anngunniunnerni peqataanertik ilinniutigilluarsimagaat.

- Anngunniunneq ataatsimut tamaat isigalugu normu 4-nngorneq naammaginarpoq, kisianni neriuppunga GHF nunanut allanut unammisartunut pingaarnertut aningaasaliisussamik nassaarumaartoq, taamaalilluta piareersaatigut annertusisinnaangatsigit, Johannes Groth oqarpoq.

Atuaruk: Kalaallit sekundi kingulleq atorlugu ajugaapput

Danmarkimi VM-imut aqqut
Panamerikami pissartanngorniunnissamut anngunniunnerit ataasinngornermiit sapaat ilanngullugu ingerlanneqarput.

Cuba aammattaaq nunat angusarinnerit sisamat Panamerikami pissartanngorniunnissamut ingerlaqqissapput. Pissartanngorniunnerit Cubap illoqarfiani Havanami maajip 21-anit 28-anut ingerlanneqassapput.

Panamerikami pissartanngorniunnermi, Pamamerikanske Mesterskabimik taaneqartartumi, angusarinnerit sisamat VM-imut Danmarkimi decembarimi pisussamut ingerlaqqissapput.

Unamminermi angusat, inissiffiit unamminerillu imaqarnialiaat uani takukkit panamhandball.org

Powered by Labrador CMS