assammik arsarneq
Kalaallit arnartaat danmarkimi assammik arsartartut ingerlalluartut
Aamma nunanut allanut unammisartut sungiusaasuata Jakob Andreasenip sungiusagai Håndboldligaenimi ingerlalluarput
Danmarkimi assammik arsarnermi 1. divisionimi arnani kalaallit pingasut unammisartuupput. Rina Møller Lorentzen Hadstenimi unammisartuuvoq, Mia Egede Rasmussen Lyngby HK-mi unammisartuulluni kiisalu Hanna Mittek TMS Ringstedimi unammisartuulluni. 1. divisionimi arfineq pingasoriarluni unammisoqareernerani tallimaattut, arferngattut arfineq pingajuattullu inissisimagallarput.
Nunanut allanut unammisartunut sungiusaasup Jakob Andreassenip sungiusagai Silkeborg-Voel KFUM Håndboldligaenimi arferngattut inissisimasut aamma ingerlalluarput. Kalaallit unammisartuisa maannakkumut angusarisaat naammagisimaarpaa.
- Pikkorissunut peqataasinnaanerat tulluusimaarutissaavoq. Tamanna nunanut allanut unammisartunut aamma sunniuteqassaaq, Panamerikamimi unammisaqattaartoqangajalerpoq, Jakob Andreassen Sermitsiaq.AG-mut oqarpoq.
Kræftens Bekæmpelsemut tapersersuilluni unamminermi Mia Egede Rasmussen unammeqataavoq.
- Lyngbyhallenimi inuppassuit isiginnaarput. 25.000 koruuninik tapiissuteqarpugut 28-22-millu TMS Ringstedimut ajugaalluta, Hanna Mittek unammeqataanngilaq, Mia Rasmussen Sermitsiaq.AG-mut oqarpoq.
Unamminermi Mia Egede Rasmussen sisamanik isertitsivoq, unammilluaqalunilu.
Panamerikamut anngunniuttoqassaaq aappaagu marsimi, unammersuaartoqassallunilu Cubami aasakkut.
Nunarsuarmut pissartanngorniunnissamut nunat sisamat anngunniutissapput, Brasilia nunarsuarmi pissartaanini pissutigalugu toqqaannartumik anngutereerluni. Taamaattumik Kalaallit Nunaata peqataasinnaanera periarfissaqarluarpoq.