Kalaallit Airport: Ukioq manna milliardit affaanik aningaasaliiniarpoq
Kalaallit Airportsip marlunngornermi ataatsimeersuarnerani ukioq manna suut anguniarneqarnersut saqqummiunneqarput. Ingerlatseqatigiiffiup 400-500 million koruuninik aningaasaliinissani naatsorsuutigaa.
Kalaallit Airport Ilulissani, Nuummi Qaqortumilu mittarfiliortitsinissamut atatillugu manna tikillugu taamaallaat 54 million koruuninik atuisimavoq.
Sanaartorneq aallartiliivissut
Mittarfiliortitsinissamut aningaasartuutissat katillugit 4 milliardit missaanniipput, ukioq mannalu aningaasalersuinerit aallartinneqassapput. Nalunaarusiaangallartut misissuinerungallartullu naammassineqarsimalerput, tullinngiipporlu mittarfiliortitsinissaq mittarfiillu illutassaanik sanaartortitsisoqarnissaa.
Aningaasaqarnermut pisortap Peter A. Wistoftip ingerlatseqatigiiffiup ukioq manna suut anguniarnerai ataatsimeersuarnermi saqqummiuppai.
Pingaarnertut mittarfiliortitsinerit aallartitsarneqarnerat sanaartorneqarnerallu ukkatarineqarniarput.
- Nuummi Ilulissanilu mittarfiliortitsinissamut suliariumannittussarsiuineq
- Nuummi sanaartornerup aallartisarnissaa
- Illuliortitsinermut tamakkiisumik siunnersuisumik toqqaaneq
Mittarfeqarfiit isumaqatigiissuteqarfiginerat
Ingerlatsinermut 10-15 million koruunit akornanni amigartooruteqarnissaq naatsorsuutaasimavoq. Ingerlatseqatigiiffimmiillu ingerlatsinermut aserfallatsaaliuinermullu Mittarfeqarfiit isumaqatigiissuteqarfiginissaat anguniangaavoq.
Mittarfiliortitsinissallu annertuumik soqutigineqarnera pissutigalugu attaveqaqatigiinnermut siunnersuisumik aamma atorfinititsisoqassaaq.
Kalaallit Airportsillu naatsorsuutigaa ukioq naatinnagu aningaasalersuinissamut pillugu aningaasaateqarfinnut isumaqatigiissutit inissinneqareersimassasut. Suliaq Danske Bankenimit isumagineqassaaq.
Mittarfiit pillugit soqutiginarsaaneq
Saqqummersitsinerillu timmisartuutileqatigiiffinnit peqataaffigineqartartut peqataaffigineqaannarnissaat aamma sulissutigineqarpoq.
- Pingaaruteqarpoq nutaanik mittarfittaarnialernerput timmisartuutileqatigiiffinnit arajutsineqannginnissaa, siulersuisuni siulittaasoq Johannus Egholm Hansen paasissutissiivoq. Ilanngullugu paasissutissiaraa Bilbaoimi saqqummersitsineq peqataaffigineqarsimasoq 2019-imilu februarip qaammataani Quebecimi Canadamiittumi Amerika avannarlermiunut saqqummersitsisoqalerpat peqataasoqassasoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...