Kalaallit Airportsip siulersuisuini siulittaasumik toqqaanermi Danmark itigartitsisinnaatitaasoq

Kalaallit Airportsimi siulersuisut siulittaasuannik toqqaasoqarsinnaanngilaq danskit naalagaaffiat akuersiteqqaartinnagu. Naalakkersuisut siulittaasuata danskillu aningaasaqarnermut ministeriata Kalaallit Airports pillugu piginneqatiginnissutigineqarneranut immikkoortualuit maanna isumaqatigiinniutigigaat Sermtsiaq.AG-p paasivaa.

Ingerlatseqatigiiffimmi allannguutit tamaasa naalagaaffiup itigartissinnaagai, isumaqatigiissummi allaqqassasut, ilisimatinneqarpugut.

Isumaqatigiissut aamma ilaatigut isumaqarpoq 'aningaasaliissutit pilersaarusiukkamik illersorneqassasut'. Tamanna isumaqaratarsinnaavoq Nuummi Ilulissanilu mittarfissuassat Kangerlussuarmit unammillerneqarnissaannut illersorneqassasut, Kangerlussuummi mittarfissat taakku marluk aningaasaqarnerat sunnersinnaammagu.

Piginneqatigiinnermut isumaqatigiissut Inatsisartuni suliarineqassanngilaq

Naaakkersuisut Siulittaasuat, Kim Kielsen (S) KNR oqarpoq, Inatsisartut apereqqaanngikkaluarlugit, danskit aningaasaqarnermut ministerianut piginneqatigiissummik isumaqatiginninniarnissaminut piginnaatinneqarluni.

- Taamaattumik apeqqut taanna Inatsisartunit isummerfigineqareersoq Naalakkersuisut siulittaasuat isumaqarpoq. Apeqqutillu pineqartup Inatsisartuni immikkut ittumik eqqartorneqarnissaanut tunngavissaqarsorinanngilaq, Kim Kielsen nutaarsiassaqartitsivimmut mailerluni akissuteqarpoq.

Mittarfinnut pilersaarutit Inatsisartuni sisamanngorpat pingajussaaneerneqarlutik ataatsimiissutigineqartussaagaluartut, taamaattoq aappassaaneerneqarnerani taperserneqarluarmat, tamanna piginnaatitsissutitut naammattutut Kim Kielsenip isumaqatinnguatsiarpaa. Pilersaarutip aappassaaneerneqarnerani novembarip aallaqqaataani, allannguutissatut siunnersuut, mittarfiliortiternermi aningaasaliissutinut tunngasut, oqaluuserineqarput. Tassani Kim Kielsenip (S) Lars Løkke Rasmussenillu isumaqatigiissutaat ilanngussanut ilaavoq, imalu oqaasertaqarpoq:

- Piginneqataasutut pisinnaatitaaffiit ilanngullugit piginnittuunermut isumaqatigiissut atuuttunngortinneqarpoq, taanna pingaarnertut makkuninnga aalajangersakkanik imaqarpoq: Niuernermi piumasaqaatit ilannguttussaannginnerlu pillugu tunngavigisaq naapertorlugit (i) piginnittuunermut tunngaviit, (ii) itigartitsisinnaatitaaneq, (iii) aqutsisut katitigaanerat, (iv) iluanaarutissatut naatsorsuutigisinnaasat, (v) piginneqataassutsit aqutsisullu katitigaanerisa allanngornerat, (vi) paasissutissat ingerlaarnerat, (vii) saqitsaannernik aaqqiissuteqarneq, (viii) susassaqaqatit allallu akornanni pissutsit.

- Piginneqatigiinnissamut isumaqatigiissummi immikkuualuttut Naalakkersuisut siulittaasuata aningaasaqarnermullu ministerip akornanni isumaqatigiissutigineqassapput.

Piginneqatigiinnissamut isumaqatigiissutip killiffia pillugu, Kim Kielsen aningaasaqarnermut akileraartarnermullu ataatsimiititaliami isumasioqatigineqaqqammerpoq.