Kalaallit Airports
Kalaallit Airportsimi siulittaasoq nutaaq
Johannus Egholm Hansen Kalaallit Airports A/S-p siulersuisuini siulittaasunngorpoq. Leo Larsen tupaallaatigineqartumik ukiup affaannaa siulittaasuusimasoq taarserpaa.
Johannus Egholm Hansen siulittaasuugallartoq Aviâja Lyberth Lennert taarserpaa taannalu siulersuisuni siulittaasup tullinngorluni.
Aviâja Lyberth Lennert atorfik inuttassarsineqarnissaa tikillugu siulittaasuugallarsimavoq.
Atuaruk: Kalaallit Airportsimi siulittaasoq tunuarpoq
Timmisartoqarfinni, ingeniøritut sulinermi, periusissianik suliniutinillu ineriartortitsinermik ukiuni 25-inik amerlanerni misilittagaqareerluni Johannus Egholm Hansen siulersuisut sulineranni piginnaaneqarluarluni sunniuteqarluarlunilu ilaalissaaq, Namminersornerullutik Oqartussat tusagassiuutinut taama nalunaaruteqarpiut, Johannus Egholm Hansen-i danskit suliffeqarfissuaataanni C20-mi atorfeqarallarpoq.
CV-a mittarfimmiippoq
Amerlasuunit ilisarisimaneqarnavianngilaq, Johannus Egholm Hansenilu mittarfinnik alliliinernik ilisimaqarpoq.
ohannus Egholm Hansen piffissami 2008-mit 2010-imut Savalimmiuni Vágar Airport-imi siulittaasup tulleraa, mittarfimmik alliliinermi annerusumi terminalimillu nutaamik sanaartornermi siuttuulluni, tamatumalu kingunerisimavaa maanna Vágar-imi ilaasut ukiumut 250.000-it missaanniilersimanerat. Misilittakkat taakku tunuliaqutaralugit Kalaallit Airports A/S-imi siunissamilu mittarfinnik Ilulissani, Qaqortumi Nuummilu talliliiniarnermik suliat malunnaatilimmik patajaallisarneqassapput, tusagassiuutinut nalunaarummi paasissutissiarineqarpoq.
FLS-p suliffeqarfissuaataanni chefjuristi
Johannus Egholm Hansen Savalimmiuuvoq 57-nik ukiulik. Inatsisilerinermik ilinniarsimasuuvoq ilaatigulli pisoraatanerup tulliatut F.L. Smidth A/S-imilu Global Manageritut atorfeqarsimalluni. FLS suliffeqarfissuaataani immikkoortoqarfinni Københavnimi Betlehemimi USA-milu Pennsylvaniami inatsisilerituutut aqutsisuunikuulluni. 2012-imi decemberip qaammataani FLSmidth suliffeqarfissuani pisortaanerup tulliatut chefjuristitulli atorfininngikkallarami inatsisilerituutut atorfeqarsimavoq kingornalu Dania Advokater-ni suleqataallunilu siulersuisuni ilaasortaasimalluni.