Kalaallit Airportsimi pisortaq nutaaq

Kalaallit Airport A/S-ip aningaasaqarnermut pisortamik atorfinitsitsilluni pisortaaqatigiit amerlivai.

53-nik ukiulik Peter Wistoft tassani atorfinitsinneqarpoq, aggustillu aallaqqaataani sulilissaaq.

Peter Wistoft ingerlatseqatigiiffimmi pisortaaqatigiinni ilaalissaaq, tamatuma saniatigut tassaniilluni Steffen Ulrich-Lynge, pisortaanertut ingerlaannarluni.

Peter Wistoft 53-inik ukioqarpoq, aammalu Kalaallit Nunaanni Deloittemut 1995 – 2017 piginnittutut atorfimmeersuulluni.

- Peter Wistoft ingerlatseqatigiiffimmi pisortaaqatigiinni ilaalernissamik neqeroorfigineqarnini, taamaalillunilu Nuummi, Ilulissani aamma Qaqortumi mittarfiliassat piviusunngortinneqarnissaannut peqataanissani akuerimmagu, Kalaallit Airport A/S-imi siulersuisut naammagisimaartorujussuuaat, siulersuisuni siulittaasoq Johannus Egholm Hansen, tusagassiuutinut nalunaarummi allappoq.

Peter Wistoft Deloittemik piginnittutut ingerlatseqatigiiffiit Namminersorlutik Oqartussanit pisortanillu pigineqartut kukkunersiorneqarnerinut akisussaasuusimavoq. Ukiorpassuarnilu taamatut misilittagaqarnera siulersuisut pingaartinnerarpaat.

- Sanaartornermi suliassat taamatut annertutigimmata, aningaasaqarnikkut aningaasalersuinikkullu suliassat aqunneqarnerisa misilittagaqartumit pikkorissumillu, peqatigisaanillu Kalaallit Nunaannut aammalu ingerlatseqatigiiffinni Namminersorlutik Oqartussanit pigineqartuni pissutsinut annertuumik ilisimasaqartumit, isumagineqarnissaat pisariaqartinneqarpoq, aammalu Peter Wistoftip atorfinitsinneqarnerani tamanna pisinnaasoq misigisimavugut, Johannus Egholm Hansen, siulersuisunut siulittaasoq oqarpoq.

Peter Wistofip Kalaallit Nunaanni politikki pillugu ilisimasaqarluarnermigut aamma politikkikkut eqqartukkat mianerineqartut aqussinnaasarnerisigut misilittagaqarnermigut ilisarisimaneqarpoq.