Kalaallit aallartitsisut pitsaanerusunik atugassaqalerput

Aallartitsisut pillugit nalunaarut nutaaq atuutileqqammersoq arlalinnik pitsanngoriaateqarpoq. Suunersut uani takukkit.

Nunatsinni ingerlatsivimmik aallartitsiniartut aningaasanik amerlanerusunik qinnuteqarsinnaalerput

Nalunaarut nalunaarutitoqqap 2014-imeersup nutarterneraa. Taanna tapiissutinik tallimanik imaqarpoq, aallartitsisut qinnuteqarfigisinnaasaannik:

Ingerlatsivimmik aallartitsinermi siunnersortimit ikiorneqarnissamut klippekorti, annerpaamik 25.000 koruunit.

Tuniassianik ineriartortitsineq, annerpaamik 300.000 koruunit.

Avammut tuniniaanerup siuarsarnissaanut suliniutinut tapiissutit, soorlu siunnersortinnermut ussassaarinermullu, annerpaamik 100.000 koruunit.

Kalaallit nerisassaataasa siuarsarnissaannut tapiissutit, assersuutigalugu tunisassianik ineriartortitsinermut ussassaarinermullu, annerpaamik 300.000 koruunit.

Sikunik imermillu suliniutinut takornariaqarnermillu suliniutinut tapiissutit, assersuutigalugu tunisassianik ineriartortitsinermut ussassaarinermullu, annerpaamik 300.000 koruunit.

Aaqqissuussinitoqqamut sanilliullugit aningaasat qaffanneqangaatsiarput. Avammut tuniniaanerup siuarsarneranut suliniutinut tapiissutit siusinnerusukkut annerpaamik 50.000 koruuniupput, nerisassanut tapiissutit 200.000 koruuniugaluarput klippekortimullu tapiissutit 12.000 koruuniugaluarlutik.

Sikunik imermillu suliniutinut kiisalu takornariaqarnermik suliniutinut immikkut tapiiffigineqarnissamut periarfissaq siusinnerusukkut nalunaarummut sanilliullugu nutaajuvoq.

Powered by Labrador CMS