Kultur Festival

Kalaallinut filmiliortartunut isumasioqatigiissitsineq

Film.gl-ip qaammammi matumani kingusinnerusukkut Nuummi peqatigiiffiup isumasioqatigiissitsinissarsuarmi filminik suliniutit arfinillit toqqarpai

Film.gl-imi siulersuisut siulittaasuat Pipaluk K. Jørgensen

Filmiliornermik misilitttagaqarluartut nutaaallu peqataassapput, kalaallit filmiliortartut isumasioqatigiissinneqalerpata, tassanilu peqataasut skandinaviami filmiliornermik siunnersortinit Christina Rosendahlimit, Helene Granqvistimit aamma Prami Larsenimit ikiorneqassapput.

Taamatut tusagassiorfinnut nalunaarutikkut allappoq kalaallit filmiliortartut peqatigiiffiat film.gl.

Workshoppi ´Take one - isumassarsinermit filmiliassap iluatsittumik aningaasaliiffigineranut´, Nuummi ingerlanneqassaaq oktobarip 20-annit 22-annut.

Filmimik suliniutit arfinillit

Filmit piviusulersaarutit pingasut, filmit aliikkutassiat marluk titartakkanillu filmiliaq ataaseq. Filminik suliniutit arfinillit, isumasioqatigiinnissarsuarmut toqqarneqartut taakkuupput.

Isumasioqatigiinnissamut qinnuteqartut 11-usimapput, tamakkualu ilagaat filminik piviusulersaarutinik suliniutit arfineq-marluk, tamannalu takussutissaavoq kalaalllit filmiliortartut nunatsinni pissusiviusut filmiliariumalluartaraat.

Pipaluk K. Jørgensen, film.gl-imi siulersuisut siulittaasuat, oqarpoq suliniutinik oqaluttuanillu pissanganartunik amerlasuunik kalaallit filmiliortartut nassiussaqarsimasut, workshoppimut qinnuteqarnissamut killissarititaq naakkaluartoq.

– Tamanna pissutigalugu peqataatinneqartussat arfinillit toqqarneqarnissaat ajornakusoorsimaqaaq, tamannali peqatigalugu periarfissinneqarsimavugut workshoppimit assigiinngeqisunik toqqaanissatsrinnut, taamaasilluni filmiliortartut siunnersortaallu suliassaaleqissanatik, taanna tusagassiorfinnut nalunaarutikkut oqarpoq.

Uku peqataassapput

Workshoppimi peqaasussat ilagaat filimilortartut ilisimaneqartut soorlu Malik Kleist aamma Inuk Silis Høegh, aammattaarli ilisimaneqannginnerusut piukkunnaatillit soorlu Pipaluk Løkke Løgstrup, taassumalu filmiliornermik suliniutaa siulleq tassaavoq qimussernermut kulturi pilugu piviusulersaarut, aamma Minik Rosing Jakobsen, filmimik aliikkutassiamik suliniutilittut peqataasoq.

Suliniutit arfinillit peqataasussatullu toqqarneqartut:
"Allagaq / The Letter". Ilitsersuisoq manuskriptiliortorlu: Minik Jakobsen. Produceri assiliisorlu: Ulannaq Ingemann
"Angut Tarraqanngitsoq". Ilitsersuisoq: Malik Kleist. Nipilerisoq/ erinniortoq: Qillannguaq Berthelsen
"Arctic Nomads". Ilitsersuisoq producerilu: Pipaluk Løkke Løgstrup
"Dance with Ice". Ilitsersuisoq: Maida Hald. Produceri: Ruth Montgomery-Andersen
"Pffissap Aarnuaa". Ilitsersuisut: Christian Rex, Martin Brandt Hansen, Inuk Silis Høegh
"To Verdener, Ét Venskab". Ilitsersuisoq: Pia C. Bang. Produceri: Ulrik Bang

Suliniutit tamanut saqqummiunneqassapput Nuuk Nordisk Kulturfestivaleqarnerani Katuami aaqqissuussinikkut.

Powered by Labrador CMS