Folketingi
Kalaallinut Danmarkimiittunut iliuusissamik nutaamik saqqummiisoq
Folketingip Kalaallit Nunaannut ataatsimiititaliaa pingasunngorpat kalaallit Danmarkimiittut peqataatinneqarnerisa nukittornissaanut aammasumik tusarniaatitsissaaq. Tusarniaaneq Inuit Ataqatigiit folketingimut ilaasortaatitaata Aaja Chemnitz Larsenip sulissutigaa
Folketingip Kalaallit Nunaannut tunngasunut ataatsimiititaliaa kalaallit Danmarkimiittut peqataatinneqarnerat nukittorneqarnissaanut ammasumik tusarniaassaaq.
Tassani folketingimut ilaasortaq Aaja Chemnitz Larsen (IA) kalaallinut Danmarkimiittunut iliuusissamik nutaamik saqqummiussissaaq. Naalagaaffimmit aamma kommuninit iliuutsit equngasumik ingerlanerannik isumaqarami, iliuusissmik nutaamik saqqummiussiniarpoq.
Amerlasuut Danmarkimut nuuttartut
- Kalaallit Nunaannit kalaallit Danmarkimut nuuttartut ukiuni arfineq-pingasuni kingullerni 20 procentimik amerleriarmata, tusarniaanermik ilaatigut sulissuteqarpunga. Tusarniaanerup siunertaraa, maanna kalaallinut Danmarkimiittunut peqataatitsinissamut iliuutsit nukittortinneqarnissaat, taanna tusagassiuutinut nalunaarummi allappoq.
Danskit kommuniisa kalaallinut Danmarkimi najugaqartunut iliuuserisatik nukittortariaqaraat, Aaja Chemnitz Larsen isumaqarpoq.
- Kalaallit Danmarkimiittut imminnut ikiornissaannut innersuussineq naammanngilaq, tamanna oqariartuut ukiup aallartinnerani danskit socialministeriannit Karen Ellemann-Jensenimit tusarparput. Kalaallit Danmarkimiittut qangali imminnut ikioreerput. Naalajagaaffimminguna aamma kommuninit iliuuseqarneq equngasoq, Aaja Chemnitz Larsen erseqqissaavoq.
Atuaruk: Siunnersuut: Danmarkip nunanut allanut politikkimini Issittoq samminerusariaqarpaa
Angusassamik toraagalimmik iliuuseqarnissaq neriuutigigaa
Tusarniaanerup siunertaraa, kalaallinut Danmarkimut nuuttartunut amerliartuinnartunut peqataatitsinermut iliuutsit qanoq nukittorsarneqarnissaat nassuiarnissaat. Ukioq manna inuuniarnermikkut ajornartorsiortut iliuuseqarfigineqassapput, aappaagulu kalaallit illuutaanni peqataatitsinermut iliuuseqarnermut tapiissutit pineqassallutik.
- Neriuutigaara kalaallit Danmarkimut nuuttartut taama amerlatiginerat, folketingimut ilaasortat amerlanerusut paasilerumaaraat.
- Neriuutigaara Folketingimi partiit akimorlugit angusassamik toraagalimmik kalaallinut Danmarkimiittunut iliuuseqarnissamik aallartitsisoqarnissaa. Kalaallinut Danmarkimiittunut ersarinnerusumik oqaatsinut politikkimik, kulturimut politikkimik aamma isumaginninnermut politikkimik nukittunerusumik peqartariaqartoq isumaqarpunga. Aaja Chemnitz Larsen oqarpoq.