ilinniartitaaneq
Kalaallinut atuartunut atuartitsissutinik nutaanik saqqummersitsisut
NAPA-p aamma nunani avannarlerni ilinniarnermut isaaffissap, Norden i Skole, akornanni suleqatigiinnikkut atuartitsissut sapaatip-akunnerani tulliuttumi saqqummersinneqassaaq
Nunatsinni meeqqat atuarfiini aamma ilinniarnertuunngorniarfinni ilinniartitsissutit nutaat saqqummilerput.
Nunani avannarlerni ilinniarnermut isaaffissaq, Norden i Skolen, 2012-iminngaanniik oqaatsini arfinilinni piunikuusoq, maanna kalaallisut atuartitsinermi atorsinnaanngorpoq.
Nunani avannarlerneersut suliaat
Isaaffimmi atuagassat, suliassat, isiginnaagassiat nunanilu avannarlerni suliat meeqqat atuarfiannut ilinniartuunngorniarfinnullu naleqqussagaapput.
Norden i Skolen NAPA – Nunani Avannarlerni Piorsarsimassutsikkut Attaveqaat suleqatigalugu kalaallisuunngortinneqartoq ilinniartitsisut atuartullu Kalaallit Nunaanni tamarmiittut iluaqutigisinnaalerpaat.
Ikinngutigiittut klassit
- Neriuppugut ilinniartitsinissamut neqeroorutip nunani avannarlerni suleqatigiinneq nukittunerulersikkumaaraa, kalaallimmi ilinniartitsisut atuartullu Norden i Skolenimi atortussat atulersinnaajumaaramikkit, assersuutigalu ikinngutigiittut klasseqalernissat, unammisitsinernut peqataanerit, aammalu Nordisk Skolechatimut ilaanissaq, Thomas Henriksen, Norden i Skolenimi pilersaarusiornermut pisortaq oqarpoq.
Norden i Skolenimik saqqummersitsineq ataasinngorpat Katuami pissaaq.