Berlinale
Kalaallinit filmiliarineqartut arlaqartut Berlinimi takutinneqassapput
Berlinimi kalaallit filmiliaasa takutinneqarnissaat filmiliortartut peqatigiiffianit film.gl-imit aaqqissuunneqarpoq. Kalaallit filmiisa nunarsuatsinni siaruarnissaat anguniarneqarpoq, peqatigiiffik nalunaarpoq
Kalaallit filmiliortarnerat siuariartussanngorpoq.
Nunatsinni filmiliortartut peqatigiiffiat film-gl taamatut nalunaarpoq.
Piviusulersaarusiaq 'Sume - mumisitsinerup nipaa' Berlinimi takutinneqaqqaassaaq sapaatip akunnerata tulliani. Kalaallit filimiliortarnerat nunani tamalaani aatsaat taama angitigisumi takutitsisoqassasoq peqatigiiffimmit nalunaarutigineqarpoq. Tassani Berlinale - nunat tamalaat Berlinimi filmfestivalernerat, ullumi sisamanngornermi aallartissaaq.
- Film.gl-imit taamatut pisoqarnera piffissaq eqqortutut isigaarput. Tassani kalaallit filmiliortarnerat nunani tamalaani paasineqarnerussaaq. Taamatut kalaallit filmiliortarnerat maluginiarneqarnerulerpat aningaasaliiniartut amerlanerulersinnaapput. Nunani tamalaani filmiliortartut suleqatigineqalersinnaapput kalaallinik peqataatitaqartumik. Kalaallit Nunaat maluginiarneqarnerulersinnaavoq, tassani aamma attaveqarfigisat amerlatsissinnaapput, film.gl-imi siulittaasoq Pipaluk K. Jørgensen tusagassiutinut nalunaarummi oqarpoq.
Kalaallit filmiliortartut Berlinimi peqataassapput:
- Inuk Silis Høegh aamma Emile Hertling Péronard, Anorak Film (Sume - Mumisitsinerup Nipaa)
- Pipaluk K. Jørgensen, Karitas Production (Oqarit! Inuullutillu aamma ANORI)
- Malik Kleist, Tumit Production (Qaqqat Alanngui aamma Unnuap Taarnerpaaffiani)
- Aka Hansen, Uilu Stories (Qaqqat Alanngui aamma Small Time Giants)
- Otto Rosing (Nuummioq)
Berlinimi februaarip arfineq aappaanni takutitsineq
Sume pillugu piviusulersaarusiaq ‘Sume - mumisitsinerup nipaa’ festivalip Panorama-programmiani peqataassaaq, tassani silarsuarmi tamarmi nutaaliorlutik filmiliortartut takusassiarineqasssapput.
Filmi Berlinimi februaarip arfineq aappaani takuneqarsinnaalissaq, kisianni pisortatigoortumik marlunngornermi februaarip qulingani Sony CineStar-biografimi takutinneqassaaq. Festivaleqarnerup nalaani DR Salesip filmip nunani allani tv-kkut takusassiarineqarsinnaaneranut iluatsitseriarniarpoq.