Kalaallinik sullissilluartoq toquvoq

Aaqqissuisoq Torben Lodberg, maajip 20-ata unnuaani 84-inik ukioqarluni toqusoq, kalaaliunngikkaluarluni qallunaaq kalaaliusorujussuuvoq. Ima kalaaliutigaluni Kalaallit Nunaannik sullissilluarni pillugu Nersornaammik nersornaaserneqarsimalluni.
1961-imi atortussaarniartartoq inuusuttoq Danmarks Socialdemokratiske Ungdom-imi (DSU) nunanut tamalaanut allatsitut atorfinitsinneqarpoq, taamatullu atorfeqarluni Union of Socialist Youth-ip Københavnhavnip avannaani Ermelundssletten-imi nunanik tamalaanik tammaarsimaartitsineranik pilersaarusiorpoq ingerlatsillunilu. Nunarsuarmit tamarmit peqataasut 1000-t angullugit amerlassusillit ilaatigut ilagaat Østrgip nunanut allanut ministeria kingornalu forbundskansler-inngortoq Bruno Kreisky, Tysklandip kingorna forbundskansleria Willy Brandt Sverigellu kingorna ministeriunera Ingvar Carlsson.
Sumiluunniilli allassimanngilaq qallunaaq socialdemokraateq inuusuttoq inuunermi ilarujussua Kalaallit Nunaat pillugu paasissutissanik suliumaartoq.
Torben Lodberg Kalaallit Nunaannik soqutiginnilerpoq ikinngummi oqaluttuummani nunami suliassat qanoq annertutiginersut. 1969-imi Lodberg Nuummi Landshøvdingeqarfimmi qaammarsaanermut immikkoortoqarfimmi pisortatut atorfinippoq, tassanngaanniillu qaninnerpaamik malinnaaffigai kalaallit inuusuttut politikilerisut Danmarkimit kiffaanngissuseqarnerulernissamik kissaatiginnikkaluttuinnartut.
Qallunaat ikittuinnaat Lodbergitut 1979-imi Namminersornerullutik Oqartussat eqqunneqariartornerat taama qanitsigisumik malinnaaffigisimavaat. Nunatsinni inuiaqatigiinni pissutsinik, politikkimik aningaasarsiornermillu ilisimasaqarnerujussuani pissutigalugu pissusissamisoorsimavoq aviisimi oqaatsit marluk atorlugit saqqummersartumi Atuagagdliutit/Grønlandsposten-imi (AG) tusagassiortutut ilisimasani atussallugit.
1972-imi Danmarkimut uterami aviisip Danmarkimi ilanngutassiortuatut sulivoq. Socialistisk Dagblad-imi redaktionssekretær-itut sulereerluni AG-p Christiansborgimi allaffia pilersippaa. Torben Lodbergip taanna ingerlappaa 1987-imi Namminersornerullutik Oqartussat Nuummi paasissutissiinermut immikkoortoqarfianni, Københavnimilu Danmarkskontorimi atorininnissami tungaanut. Tamatumunnga atatillugu nammineq tusagassaqartitsivini Tusagassisorfik pilersippaa.
Kalaallit Nunaannik ilisimasaqarnermik qallunaanut siammarsaanerujussuarmi saniatigut Torben Lodberg aamma kalaallit politikeriinut nuimanerusunut, aamma qanimut ikinngutigilersimasaminut, spindoktoritut sulivoq.
1988-imi Torben Lodberg aaqqissuisoralugu Namminersornerullutik Oqartussat atuagaq Grønlands Grønne Bog saqqummersippaat. Atuagaq kingorna arlaleriarlugu nutarterneqartarsimasoq 2001/02-miilli saqqummeqqissimanngilaq.
Torben Lodberg 2000-mi Namminersornerullutik Oqarrtussat paasissutissiinermut immikkoortoqarfiannit soraarninngoraluarluni Kalaallit Nunaannik soqutiginninnerujussuani attatiinnarpaa, ilaatigut peqatigiiffimmi Foreningen af Grønlandsjournalister-imi, 1984-imi pilerseqataaffigisimasamini, ukiorpassuarni siulittaasutut.
Aaqqissuisoq 84-inik ukiulik tusagassiortutut sulisimavoq, siullermik Socialdemokratiets Nyhedstjeneste-mi taavalu DR-mi, tassani ukiuni arlalinni politikkikkut inuusuttunut aallakaatitassiat aaqqissuuttarsimallugit.
Katersuiniarnersuarmi Flygtning ´66-imi, Dansk Flygtninghjælp-imi pisortap tulliullunilu paasissutissiinermut pisortaavoq. Tassannga misilittakkani Kalaallit Nunaanni atorpai, Qimaasoq 71-imi katersuiniarnermi ingerlatsisuugami.
Torben Lodbergip 1989-imi Namminersornerullutik Oqartussat ukiunik qulinngortorsiornissaat pilersaarusiorpaa, tamatumunngalu atatillugu Den Kongelige LIvgardes Musikkorps-ip aammalu Københavns Drengekor-ip Kalaallit Nunaanni angalanerat aaqqissuullugu.
Lodbergip piumasarisimavaa Livgarden-ip atisani assuutini aappalaartut atussagai. "Tamanna sapernarluinnarpoq Dronningi peqataanngimmat", Lodberg akineqarpoq, tunniutiinnanngilarli. "Angalanissamut uniformisi aappalaartut nassaannarsigit, Dronningi qaaqquneqarpoq takkunniarlunilu neriorsuivoq", Lodberg akivoq.
Toben Lodbergip ukiorpaaluit matuma siornatigut Kalaallit Nunaat qimassimagaluaraa puigorneqarsimanngilaq. Tamanna ersarissumik takutinneqarpoq aggustip aallaqqaataani aaqqissuussinermi "Kalaallit Nunaat Tivolimi", tassani ikinnguterpassuisa ilisimasarisarpassuisalu aaqqissuussisutoqaq ilassiartortarmassuk.