Kalaallimik toqutsisimanermut suliami parnaarussaq nutaaq

Angut 19-ninik ukiulik Hjørringip eqqartuussiviani inatsit tunngaviusoq naapertorlugu killisiorneqareerluni aprilip pingajuata tungaanut eqqartuussisup aalajangigaanik parnaarussaagallarpoq.

Pisuunnginnerartoq

Ukiup aallartilaarnerani angummik 20-nik ukiulimmik toqutsisimasutut unnerluutigineqartoq pisuunnginnerarpoq.

Nordjylland Politiini, politikommisæri, Henrik Staal, paasissutissiivoq.

- Paasiniaanitsinni paasisagut malillugit ullumi angummik allamik parnaarussingallarpugut, Nordjylland Politiini, politikommisæri, Henrik Staal oqarpoq.

Atuaruk: Skagenimi toqutsineq: Sakku krydsnøgle ujarneqartoq nassaarineqarpoq

19-ninik ukiulik suliami atatillugu parnaarussaareersimasoq, Henrik Staalip oqaluttuaraa. Taamanilu ulluni marlunni parnaarussaareerluni aninguisitaasimasoq oqaatigalugu.

Suliamut atatillugu tigummigallarneqartut angutit pingasuupput taakkuli 27-nik, 28-nik 41-nillu ukioqarput. Tamarmik toqutsisimasutut unnerluutigineqarsimapput, tamarmillu pinngitsuunerarlutik.

Sakkortuumik annersagaasimasoq

Angut 20-nik ukiulik januarip 16-ani ukioq manna Skagenimi, Skagavejimi inaani toraarneqarpoq. Angutillu sakkortuumik annersagaasimanini ullut arlaqanngitsut qaangiummata toqqutigaa.

Angut 20-nik ukiulik qitermigut savimmik qiuutinillu kapoorneqarsimavoq. Taakkulu saniatigut niaqquata saarnga pingasunik putuneqarsimavoq kiinaanilu napineqartitserluni.

Atuaruk: Angut kalaaleq inuusuttoq Skagenimi toqutaasoq

Angutit aallaqqaammut toqutseriarsimasutut unnerluugineqarsimangaluarput. Angullu 20-nik ukilik toqukkut qimagunnerata kingorna unnerluutiginninneq toqutsisimasutut allanngortinneqarluni.

Patsiserineqartoq suli paasineqanngilaq

20-nik ukiulimmut sakkortuumik saassussisimanermut suna patsisaasimanersoq Henrik Staalip paasissutissiarisinnaanngilaa.

Saassusinerlu aanngajaarniutinut attuumassuteqarnera allaaserineqarnikuuvoq.