Royal Greenland
Kalaaliminernik aatsaat taama tunisaqartigaaq
Royal Greenlandip kalaaliminernik Nunatsinni niueruteqarnerani juulimi kaaviiaartitat aatsaat taama amerlatigipput
Royal Greenlandip kalaaliminernik tuniniaanera ingerlalluartupilussuuvoq.
Kaaviiaartitat juuli 2016-imi 3 millioner koruuningajaasut juuli 2015-imi kaaviiaartitanit 1 millioner koruuninit ikinnerunngitsunik amerlanerupput, tamannalu aatsaat taama annertutigaaq, suliffeqarfik nittartakkamini allappoq.
- Ingammik qullukkat, saarulliit issimi panertitat, raajat, qalerallit pujuukkallu tunisaanerulerput. Taamaattumik soorlu qullukkat aamma saarulliit issimi panertitat tunisassiarisinnaasatta annertussusaannit massakkut annertunerupput, Nunatsinni tunisassianik tuniniaavimmi tuniniaasoq Ingo Hansen RG.gl-imut oqarpoq.
Pisisartut amerlanerusut
Naak sineriammi tunisassiorfiit amerlanerulinngikkaluartut tuniniaaneq ingerlalluarpoq. Raajallu akimikkut kisimik qaffannikuupput.
- Pisisartuvulli amerlanerulerput, tunisaqarnerunitsinnullu ilaatigut pissutaaqataapput. Illoqarfinni pisiniarfeeqqat namminersortut ilaatigut pisisartorilerpavut. Igaffissuaqarfiillu amerlanerusut soorlu neriniartarfiit, sullissiviit umiarsuillu pisisartorilerlugit, Ingo Hansen oqarpoq.
Atuaruk: Royal Greenland pisortat aningaasaateqarfiinut 172 millionit koruuninik akiliuteqarsimavoq