Kalaaleq 'perulluliortoq' eqqissiallattoq

Nunanut allanut naalakkersuisup Vittus Qujaukitsup (S) sisamanngornermi danskini illuatungerisani, Anders Samuelsen (LA), siullermeerluni ataatsimeeqatigigamiuk eqqissisimannguatsiarpoq.

Qaammat ataasiunngitsorluunniit matuma siorna Qujaukitsup Politikenimi apersorneqarnermini uissuumminartumik danskit oqartussaat 'anneruniartutut' oqaatigai, Danmarkillu Kalaallit Nunaat pingaartinnginnerarlugu.

Atuaruk: Vittus uummaarissumik oqallitsitsisoq

Ikinngutinnernerusoq
Tamatumalu siuliani amerikamiut sakkutooqarfiisa iluarsaanneqarnissaannut atatillugu Danmark akisussaaffimmini qimaanerarlugu Berlingskemi allaatiginnilluni avoqqaarpaa.

Kisianni nunanut allanut naalakkersuisut marluk naapertorlugit naapeqqaarnerminni nipi ikinngutinnerneruvoq, tamanna ukiumoortumik Kalaallit Nunaata Københavnimi aallartitaqarfiani ukiortaamut ilassinninnermi pivoq.

- Tamanna ataatsimiinnerput siulliuvoq, eqqissisimasumillu pivoq. Suliat pingaarsorisagut saqqummiuppakka, kisianni itinerusumik eqqartunngilagut, Vittus Qujaukitsoq oqarpoq.

Atuaruk: Vittup Danmark USA-lu sioorasaarpai

Oqaloqatigiinneq pitsaasoq
- Suut oqaluuseraasigit?

- Tamanna oqaluttuarinianngilara.

Anders Samuelsenip aamma ataatsimiinnerup kingorna, nunanut allanut naalakkersuisut Qujaukitsup malunnaatilimmik Danmarkimut oqariartuuteqarnera oqaluuserisimanerlugu eqqartorusunngilaa:

- Pitsaasumik oqaloqatigiinnermik aallartitsivugut, ajunngitsumillu oqaloqatigiittugut isumaqarpunga.

- Kisianni danskit tusagassiorfiini oqariartuutigisimasai eqqartorpisigit?

- Sammisarpassuit eqqartorpagut, kisianni taakku eqqartornianngilakka, Anders Samuelsen oqarpoq.

Danmarkip Kalaallit Nunaatalu akornanni ungasinneq
Naak nunanut allanut naalakkersuisut saneqqutiinnarlugu oqalukkaluartut, Kalaallit Nunaata aamma Danmarkip akornanni ungasissuseq annertusiniarlugu ukiaanerani qeqertarujussuarmi naalakkersuisut nutaat pilersinneqarneranni sukkatsinneqartoq isertuunneqanngilaq.

Tassami naalakkersuisoqatigiinnermut isumaqatigiissummi ''Kalaallit Nunaat allanngortinneqarsinnaanngitsumik namminiilivikkiartorpoq'' allaqqavoq.

Atuaruk: Issittumi suleqatigiinneq isornartorsioraa

Nunanut allanut naalakkersuisup Danmark pillugu oqariartuutini nammineq isummersuutigigai, Naalakkersuisut siulittaasuata Kim Kielsenip (S) oqaatiginikuuaa.

Taassumallu aamma Kalaallit Nunaata Danmark qimavinnissaa oqaluuserisanut ilaasoq sisamanngornermi Københavnimi isertuutinngilaa.

Atuaruk: Jens-Erik Kirkegaard: Anneruniarput

Namminersulivinnissamik eqqarsaatit
- Kalaallit Nunaata namminersulivinnissaanut allornikkaartumik sulivugut. Inuit ilaasa qaqugu namminersulivittoqarnissaa ullulernissaa kissaatigaat. Uanga taamaanngilanga, taanna Kalaallit Nunaata Københavnimi Sinniisoqarfiani issiavimmit taama oqarpoq.

Naalakkersuisut tunngaviusumik inatsisissamut isumalioqatigiissitamik ukiormanna pilersitsissasut kalerriutigaa.

Kielsenilu aamma Danmark pillugu pitsaasumik oqaaseqarpoq.

- Danmark ikinngutigiinnermut suleqatigiinnermullu pitsaasumut qujaffigerusuppara. Ukioq pilluarnartuunissaa pitsaasuunissaalu neriuutigaara, Naalakkersuisut siulittaasuat oqalugiarnermini oqarpoq.

Atuaruk: 'Danmark makitaniartoq' pillugu suliaq tamaat

/ritzau/