Saqqummersitsineq
Kalaaleq nunani tamalaani saqqummersitseqataalersoq
Islandimi naalakkersuisut eqqumiitsuliortoq Georg Olsen nunat tamalaat saqqummersitsinissaannut qaaqquaat
Georg Olsen, rockimik nipilersortartuni Liima Inui-ni ilisimaneqartoq, eqqumiitsuliortut nunanit tamalaaneersut 50-it Islandimi suliaqarlutillu saqqummersitsinissaanni ’Fresh Winds’imi peqataasussanngorpoq. Tamanna pissaaq illoqarfimmi Gardurimi decemberip 21-aniit.
Georg Olsen eqqumiitsuliortutut ilinniarsimasuusoq Islandimi saqqummersitassaminik inaarsaaleruttorpoq.
Matut nutaat
- Qalipakkat titartakkallu arlariit nassarnagit suliakka videoliarivakka, Georg Olsen Sermitsiaq.AG-mut oqarpoq.
Videoliani nammineq nipilersuusersorsimavaa worshoppini decemberip 21-ani aallartittussani oqalugiarnissaminut atatillugu takutissallugu.
Georg Olsenip suleqatigisussanngorpai eqqumiitsuliortut Japanimeersut, USA-meersut, Frankrigimeersut Islandimeersullu.
Workshoppeqarnerani decemberip 21-niit januarip 26-ta tungaanut pisussami eqqumiitsuliortut misilittakkaminnik paarlaasseqatigiissapput tamatumalu kingorna saqqummersitsineq ammarneqassaaq.
- Qangali kissaatigaara eqqumiitsuliortuuneq inuussutissarsiutigilerusullugu. Taamaammat pissanganarpoq eqqumiitsuliortut nunanit allaneersut naapinnissaat. Imaassinnaavoq saqqummersitsinernut suliassanulluunniit allanut periarfissanik takkuttoqartoq, Georg Olsen oqarpoq.
Georg Olsenip qalipagai uani takusinnaavatit