qallunaat assammik arsarnerat
Kalaaleq målmandi 1. divisionimut nuuppoq
Assammik arsarnermi målmandi Rina Møller Lorentzen Hadstenimut 1. divisionimiittumut nuuppoq. Tamannali aamma pilliuteqarfiuvoq
Hadstenimi Danmarkimi assammik arsarnermi 1. divisionimiittumi marloriarluni misiliilluni Rina Møller Lorentzenip sungiusaqataanera iligiit sungiusaasuata Daniel Grønhøjip naammagaa isumaqarami Rina Møller Lorentzen Qeqertarsuarmeersoq ukiumi unammiffiusumi aallartittussami tassaassasoq iligiit målmandiat. Taamaasilluni Rina Møller Lorentzen atsiorpoq aasarsiornerup kingorna Silkeborg Voelimit 2. divisionimiittumit Hadstenimut nuussalluni.
Ukioq unammiffiusoq ataaseq Rina Møller Lorentzen 2. divisionimi unammisartuuvoq siornatigut GSS-mi Nuummi unammisartooreerluni. Taanna aamma kalaallit nunanut allanut unammisartuini målmandiusoq ukiumi unammiffiusumi aallartittussami nutaanik unammilligassaqalerpoq.
- Silkeborg Voelimiinnera pissarsissutaalluarsimaqaaq aammali kissaatigisimavara unammisartutut suli ineriartoqqikkusullunga. Taamaammat nuna tamakkerlugu sungiusaasoq Jakob Andreasen oqaloqatisimavara nutaamillu klubbitaarniarninni taassuma ikiorsimavaanga, Rina Møller Lorentzen Sermitsiaq.AG-mut oqarpoq.
Kalaallit arnat nunanut allanut unammisartut junimi Islandimut sungiusariarput tassanilu Rina Møller Lorentzen Jakob Andreasenimik oqaloqateqarnissaminut periarfissaqarluarsimavoq.
Tusarnaartitsinerit unitsippai
Islandimeereernermi periarfissamik takkuttoqarpoq Rina Møller Lorentzen Hadstenip 1. divisionimi unammisartuini sungiusariarnissamut qaaqqusaammat. Marloriarluni misiliilluni sungiusaqataareersoq nuunnissaa isumaqatigiissutigineqarpoq.
- Rina Hadstenimi malinnaaffigissallugu pissanganarluinnarpoq qularutissaanngilarlu periarfissagissaartoq. Angivoq aammalu pitsaasumik angusaqarniarluni aalajangersimalluinnartuuvoq. Isumaqarpunga unammisaqattaarluariaruni sungiusarluarlunilu Hadstenimut iluaqutaallualerumaartoq, Daniel Grønhøj Hadsensport.dkmut oqarpoq.
Aningaasaliisoq kalaaleq
Rina Møller Lorentzen aamma erinarsullaqqissuuvoq cd-millu saqqummersitsereerluni. Taamaattoq nuannarinnittai tusarnaartitsivigineqarnissamut utaqqigallartariaqassapput.
- 1. divisionimi unammisartuuniaraanni 100 procentimik assammik arsarnermut tunniusimasariaqarpoq. Aggustip qaammataani Tasiilami Nuummilu septemberimi tusarnaartitsinissamut qaaqqusaagaluarpunga. Nalunaarfigaakkalli 1. divisionimiinnerma nalaani Danmarkip Nunattalu akornanni uteqattaarlunga angalakulaarsinnaananga, Rina Møller Lorentzen oqarpoq.
Sapaaatip akunnera tulleq Danmarkiliassaaq 1. divisionimilu unamminera siulleq septemberimi pissaaq.
- Klubbitaanni arsartut immikkut aningaasaliisoqartarput. Assut nuannaarutigaara timersuutaarniarfik Ittu atortutigut angalanermullu aningaasartuutinut aningaasaliisuujumammat. Assorsuaq nuanneq Nunatsinniit taamatut tapersersorneqarluni, Rina Møller Lorentzen oqarpoq.