Kalaaleq atuakkiortoq Danmarkimi nersualaarneqartoq

Nunaqqatitta sapiilluni atuakkioqqaartup atuakkiamini qulequtalimmi ‘Homo sapienne’ kinguaassiutitigut inissisimaffitsinnik eqqartuisup saqqummersitaminik Danmarki anguaa.

Niviaq Korneliussenimi atuakkiaqqaatiminik qulequtalimmik ‘Homo sapienne’ kusanarluinnartumik Politikenimi sisamanngornermi nersualaarneqarpoq. Nersualaarneqarnermini uummateeqqanit arfinilinnit tunniunneqartartunit tallimat pissarsiarai.

- 24-nik ukiulik Niviaq Korneliussen tunuliaqutaralugu Kalaallit Nunaat atuakkiortoqalerpoq avaqqutiinnarneqarsinnaanngitsumik. Issittumi pinngortitarsuaq alianaatsoq oqaluttuarinngilaa, kisianni Nuummi inuusuttuuneq, tamatumalu malitsigisaanik ajornartorsiuteqarneq, atoqatigiittarnermut tunngasut, annersaasarnerit, atornerluinerillu sammivai, Jes Stein Pedersen allappoq.

Assit takukkit: Atuakkiorngaartup sapiilluni kinguaassiutitigut atoqatigiittarnerit eqqartorpai

Atuaruk: Kalaallip atuakkiaa Danmarkimi aamma tuniniarneqassaaq

Jes Stein Pedersenillu Niviaq Korneliussen nersualaarlugu nangilluni ima allappoq:

- ‘Homo Sapienne' alloriaaterujussuuvoq Korneliussenimut allaaserinnittarnermut kalaallit inuusuttut unammisinneqarneranni siorna peqataaqqaartumut.

- Aamma kalaallit atuakkiaannut alloriarnerujussuuvoq, atuakkiammi ukiuni kingullerni nunarsuup pinnissusaanut tunngasunik taallartallit Nunat avannarliit siunnersuisooqatigiivisa atuakkiortunut nersornaasiuttagaannut innersuunneqartarmata.

Niviaq Korneliussens atuakkiaqqaataani qulequtalimmi ‘Homo sapienne’ ilaatigut arnaqatiminoortartut marluk, anguteqatiminoortartoq ataaseq, angutinik arnanillu atoqateqartartoq kiisalu transeksueli sammineqarput, asanninneq, ikinngutigiinneq ilaqutariittullu qileruteqarneq aamma sammineqarlutik.

’Homo sapienne’ Danmarkimi novembarimi saqqummersinneqarpoq.