Arctic Winter Games
Kajumissutsininnik aqutsisut AWG sioqqullugu naggataamik ataatsimiipput
Sapaatit akunneri marluk sinnilaaginnarlugit qaangiuppata unammiuaarnerit aallartissapput, kajumissutsiminnillu sulisut tikeraat tikinnginneranni piareersaanerit kingulliit ingerlappaat
Arctic Winter Gamesimi kajumissutsiminnik sulisorpassuit ukiuni marlunni ukiuunerani unammiuaarnissat piareersareeraallu unammiuaarnerit aallartinnissaannut sapaatit akunneri marluinnanngorput.
Sisamanngormat unnukkut kajumissutsiminnik gruppiini siulittaasut unammiuaarnissat aallartinnissaat sioqqullugu naggataamik ataatsimiipput.
Komitiit katersortinneqarput
Marsip aallartinnerani tikeraat 2.000-t sinneqartut Nuummut tikissapput, kajumissutsiminnillu sulisut ilaat ukiut marluk missaanni ´komitiini´ assigiinngitsuni 60-ini immikkut suliassanik suliaqarsimapput.
Ippassaq komitiit siulittaasui siulittaasullu tullii kajumissutsiminnik sulisunit katillugit 1.700-nit siullersaallutik atisanik quppersakkamillu tuniorarneqarput.
Chemnitz Narup qujavoq
Ataatsimiinnermi sammineqarpoq kajumissutsiminnik sulisut unammiuaarnerit nalaanni qanoq suliaqassanersut, kikkut sulerissanersut, assersuutigalugulu pisuni assigiinngitsuni kina saaffigineqartassanersoq.
Aaqqissuussarsuarmi tikeraartitsisussaq, illoqarfiup borgmesteria ataatsimiinnermi peqataavoq kajumissutsiminnik sulisut qitiusumik inissisimasut, suliniummik sulilluarsimaqisut, qamannga pisumik qutsavigalugit.
Ilaqutariissuit
Taamatuttaaq Kalaallit Nunaanni AWG.p pisortaa Maliina Abelsen qujassuteqarpoq.
– Ilaqutariissuanngorsimavugut, nalissaqanngilarlu kajumissutsiminnik sulisut taama amerlatigisut ataatsimoorlutik kivitsisut takullugit. Komitemi siulittaasorpassuit tulliilu, allallu komiteni kajumissutsiminnik sulisut, salliunissaminnik ataatsimoornerullu nukittorsarnissaanik piumassuseqarsimasut, qamannga pisumik qutsavigaavut,
Kajumissutsiminnik sulisut allat tamarmik pinngitsooratik peqataaffigisassaannik paasissutissiilluni ataatsimiitinneqartassapput, sapaatip akunnerata uuma naanerani aallartittumik. Tamakkunani paasissutissinneqassapput aammalu atisassaannik, atortussaannik quppersagassaannillu tuniorarneqassallutik.