Kajumissutsiminnik suliaqartut ineriartoqqinnissaat anguniarlugut pikkorissaaneq

Timersortartut Kattuffiat GIF, AWG 2016 aamma Meeqqat Inuunerissut MIBB, suleqatigiillutik, namminneq kajumissutsiminnik suleqartunik pikkorissaanissat 2014-imi pilersaarutigineqartut sisamaasut aappassaat naammassereerpaat. Pikkorissaanermi tassani novembarip arfineq aappaanni Nuummi ingerlanneqartumi, namminneq kajumissutsiminnik suleqataasartut, Kalaallit Nunaanni sumiiffinni tamaneersut peqataapput.

GIF, AWG 2016 aamma Mibb ataatsimut tusagassiutinut nalunaaruteqarput.

Kalaallit Nunaanni nammineq kajumissuseq naapertorlugu suleqataasarnerup immikkut sammineqarnissaanut, GIF, AWG2016 amma MIBB suleqatigiillutik suliniuteqarnerannut atatillugu pikkorissaaqattaarnerit ingerlanneqarput. Inuppassuit namminneq kajumissutsiminnik qasusuillutik maligassiuillutillu suleqataasartut suliniuteqarnikkut nersorniarpaat. Meeqqat, inuusuttut peqqinnissarlu pillugit inuit tamakkua sammisaqartitsinermikkut, klubbimik, peqatigiiffimmik inuiaqatigiillu ataatsimut isigalugit ineriartortinnerannut peqataapput.

- Namminneq kajumissutsiminnik sulerusussuseqartut tunniusimallutik nukippassuarnillu atuillutik sunniuteqarusunnerat pissutigalugu, sapaatit akunnerit tamaasa Najap arfineq pingasunik ukiullip assammik arsariartarlunilu kalattooriartarsinnaanera assut nuannerpoq. Namminneq kajumissutsiminnik suleqatasartut nukittorsarusuppagut atorsinnaasaannillu sakkussikkusullutigit, GIF-imit Carsten Olesen, AWG 2016-mit Arnakkuluk Jo Kleist aamma Mibb-mit Mette Eistrup tusagassiutinut nalunaarummi oqarput.

Pikkorissaanerni pikkorissaasut ilisimasaminnik pikkorissartunut tunnioraanerat saniatigut aamma pikkorissartut ilisimasaminnik imminnut tunioraattarput kiisalu pikkorissartut ilisimasaminnik pikkorissaasunut tunioraasarlutik. Pikkorissaanerit nutaanik sakkussaqalernissamut isumassarsiorfiusarput, ilisimasanilli misilittakkanillu aamma siaruaassiffiusarlutik.

- Qaqortumi Nuummilu maannakkut pikkorissaasoqareerpoq, taakkualu soqutigineqarluarlutillu peqataaffigineqarluarput. Peqataasut amerlasuut namminneq kajumissutsiminnik suliaminnut tunniusimalluaraluarlutik sakkussaaleqinerat ersarissumik malugaarput. Pikkorissaanerit, nammineq kajumissuseqarnikkut suleqataasarnernut taamaalillutillu inuiaqatigiinnut pingaaruteqartut, taamaalilluta takusinnaavarput. Suleqataasartut tamakkua annertuumik nersorneqarlutillu inerisaaffigineqartuartariaqarput, aaqqissuisunit oqaatigineqarpoq.

2016-ip tungaanut Nunatsinni sumiiffinni assigiinngitsuni pikkorissaasoqarsimanissaa pilersaarutigineqarpoq. Pikkorissaanissat tulliuttut Sisimiuni novembarip 25-anni kiisalu Ilulissani novembarip 27-anni ingerlanneqassamaarput. Naak Inatsisartunut qinersinissaq sioqqutilaarlugu pikkorissaanerit ingerlanneqartussaagaluartut, nammineq kajumissuseqarnikkut suleqataasarneq pillugu pikkorissaasarnerit peqataaffigineqarluarlutillu sakkussanik pissarsiaqarfiujulluarumaartut aqqissuussisut neriuutigaat.

Assit ataani takukkit