Kajumissutsiminnik isiginnaartitsisut nunatsinneersut
Kiinnat Festival peqataasunut isiginnaartunullu iluatsilluarpoq
Peqataasut 100-t, illoqarfinniit nunaqarfinniillu arfineq pingasuneersut isiginnaartitsisartut eqimattat arfineq pingasunngorlugit agguataarneqarsimasut Nuummi sapaatip akunnerata naanerani isiginnaartunut 915-inut isiginnaartitsipput. Tamanna pivoq Nunatta Isiginnaartitsisarfia kajumissutsiminnik isiginnaartitsisartut isiginnaartitsisoralugit festivalertitsimmat - Kiinnat Festival 2018 - aggustip 25-ianniit 26-iata tungaanut pisoq.
Nuummiut isiginnaartitsinerit nuannaraat amerlasuullu ataasiinnaq isiginnaarnagu isiginnaagassiat arlallit isiginnaarpaat. Isiginnaagaq naappat tullia aallartittussanngorlugu aaqqissorneqarput.
- Isiginnaariat takusaminnut ajunnginaarsisut takusinnaavagut, taama oqarpoq suliarinnittoq Manasse Berthelsen, nangillunilu oqaatigaa festivalertoqarnerani isiginnaagassiat assigiiaannginnissai pingaaruteqartoq.
Ilumoorsaarnerit quianartullu
Inuiaqatigiinni ajornartorsiutit pillugit isiginnaagassiat ilumoorsaartut, oqaluttuaatigut quianartullu pillugit isiginnaagassiani arfineq pingasuni assigiinngeqisuni ilaatigut taakkuupput.
Festivalip ulluni tallimani ingerlanerani peqataasut nutaanik ilisarisimasaqalerput, misilittakkanik eqqartueqatigiipput isiginnaartitsinerminnilu imminnut isumassarfiorfigalutik.
Kajumissutsimik isiginnaartitsisarnermut siunnersorti Gitte Ballesheim ukiuni pingasuni kingullerni seminarertoqaraangat kajumissutsimik isiginnaartitsisartut sullittarnerinut Nunatta Isiginnaartitsisarfiata qujaffigerusuppaa, tamannalu Kiinnat Festivalertoqarneranik kinguneqarpoq kiisalu aamma isiginnaartitsisartumut Connie Kristoffersenimut katerittoqarneranut suliamut annertuumut aaqqissuussisimaneranut qujarusulluni.
- Peqataasut amerliartorput
–Peqataasut isiginnaartullu iluatsilluarnerat Nunatta Isiginnaartitsisarfianiit tulluussimaaqaagut, taama isiginnaartitsinermi aqutsisoq Susanne Andreasen oqarpoq.
- Aatsaat siullermeerluta kajumissutsimik isiginnaartitsinermi festivalertitsivugut, ilinniutigeqaarput - aamma tullissaanut qanoq pitsaanerulersinnaanerluta paasivarput, Kalaallit Nunaammi tamakkerlugu kajumissutsimik isiginnaartitsisarnermik suliaqarneq ingerlatiinnarusupparput.
- Festivalertoqarnerani pisut oqaasertaleruminaapput, kisianni peqataasut isiginnaartitsinikkut inuttut piginnaasaqaleriartornerat takusinnaavarput. Eqimattani ataatsimoorneq suleqatigiinnerlu taanna nuannerluinnarpoq, kiisalu amerlasuunut nuannersumik sunniuteqarsimalluni.
- Isiginnaartitsinermik suliaqarnermi iluaqutit peqataasunit amerlasuutigut atorneqarsinnaapput, ersaripporlu peqataasut isiginnaartitsinermik suliaqarnertik ilutigalugu ulluinnarni toraartagaannut tunngatillugu oqaasinnguinissaminnut iluaqutigigaat.
- Neriuppugut festivalertoqarnerani politikerertagut malinnaasimassasut, aningaasatigummi tapersersorneqaannarnissaq pingaaruteqarpoq, patajaatsumik tapersersorteqarnikkut kajumissutsimik isiginnaartitsinermik suliaqarneq aaqqissuussinerillu annerusut allarpassuillu ingerlatiinnarsinnaavagut.