nersornaasiineq
Kajumissusilimmut uummatilimmut 100.000 koruunit tunniunneqartut
Sapaammi ualikkut Brugsenip ukiumoortumik nersornaasiuttagaa, 100.000 koruuninik nalilik, Toku Oshimamut Qaanaameersumut tunniunneqarpoq.
Innuttaasunut kaffillertoqarpoq Kalaallit Nunaanni Brugsenimilu siulittaasoq Ib Lennert Olsen oqalugiarpoq.
Ilaatigut ima oqarpoq:
- Brugsenimik nutaamik ammaaniarluta maaniinngilagut. Kisianni maaniippugut inuk immikkuullarissoq, maligassiuisoq, uummatigissoq inuiaqatigiinnilu immikkuullarissumik iliuuseqartoq nersorniarlutigu.
- Kalaallit nunatsinni inuppassuarpoq nukittuunik immikkuullarissumillu iliuuseqartuusunik. Inuit namminneerlutik akisussaaffimmik tigusisimasut inuiaqatigiinnilu ajunngitsunik sunneeqataasut.
- Nersorniagarput piniartutut inuussuteqarpoq, taassumallu saniatigut meeqqat inuusuttullu angerlarsimaffimmini tikilluaqqusarpai. Angerlarsimaffimmi tassani kissalaarneq misigineqarsinnaavoq tamaanilu aamma meeqqat allat peqatigineqarsinnaallutik. Tamaani assassortoqarsinnaavoq tamaanilu ataqqaqatigiinneq aamma ilinniarneqartarluni. Inuk pineqartoq immikkuullarissuuvoq taassumallu kulturerput ileqqugullu meeqqanut inuusuttunullu ingerlateqqittarpai. Meeqqat aliasuuteqarpata aamma oqaloqatigisarpai, Ib Lennert Olsen ilaatigut oqarpoq.
Toku Oshima arnaavoq, Qaanaami piniartutut inuussuteqartoq. Illoqarfimmi meeqqat inuusuttullu ukiuunerani angerlarsimaffimmini mersoqatigisarpai nuannisaqatigisarlugillu.
Meeqqat inuusuttullu illoqarfimmi angalaaginnarlutik aserorterisartut nuannarisarsimanngilai taamaattumik iliuuseqarniarluni aalajangersimavoq. Aamma Qaanaami inuusuttut akornanni imminortarneq iliuuseqarfigerusussimavaa.
Ukiut sisamassaat angerlarsimaffini meeqqanut inuusuttunullu ammaassimavaa. Ataasinngornikkut, pingasunngornikkut, tallimanngornikkut weekendimilu angerlarsimaffimmini mersortitsisarpoq allanillu aamma sammisassaqartitsisarluni.
Atortussat Toku Oshimap nammineq isumagisarpai meeqqallu angerlarsimaffimminiitittarlugit. Aamma ikioqatigiittarnissaq, ataqqeqatigiittarnissaq suleqatigiittarnissarlu meeqqanut ilinniutigisarpaa. Meeqqat aliasukkaangata aamma oqaloqatigisarpai.
Toku Oshima aningaasaateqarfinnut aningaasanik qinnuteqarsimavoq, ilaatigut naatitanut kaagiaqqanullu atugassanik qinnuteqarsimalluni. Meeqqat peqatigalugit aamma utoqqaat illuanni najugaqartunut tupaallattitsimapput. Aaqqasiorlutik, isersimmatit alersillu, utoqqaat pissaannik. Pisoq iluatsilluarsimavoq meeqqallu iliuuserisimasartik assut ilikkagaqarfigisimavaat.
Toku Oshima arnaavoq immikkuullarissoq nersortarialik.
100.000 koruunit Kalaallit Nunaanni Brugsenip siulittaasuannit Ib Lennert Olsenimit pisortamillu Susanne Christensenimit tunniunneqarput.
Siornatigut nersornaaserneqartarsimasut
- 2011: Napparsimmavimmi quiasaarisartoq
- 2012: Iliuuseqarit, GSS
- 2013: Nunatta nerisassaatai, Ipiutaq aamma Hotel Arctic
- 2014: Meeqqat peqqissuunerlu, Atuarfik Kristian Lundblad
- 2015: Aasakkut atuarfik Naalersitaq qeqqussanillu suliaq ”Qeqqualerisunngorniat illukumi”
- 2016: Piginnaaneqarneq, 9.a Narsap atuarfia