Kajumissaarut: Qaninniartartunut naaggaarit

Qaninniarluni paamisaarisarnerit qinngasaarinertut ipput atoqatigiinnissamillu kajumissaarutaasinnaallutik, taqassinartunik quiasaarinerit, atoqatigiinnissamik telefonikkut naalliutsitsinerit imaluunniit atoqatigiinnissamik apersuinerit. Aamma allatut kanngunarsaasoqartarsinnaavoq, soorlu atisaqanngitsunik assinik takutitsineq qaninniarluni paamisaarutaasinnaavoq.
Taamatut tusagassiorfinnut nalunaarutikkut oqarput Kalaallit Nunaanni Naligiissitaanermut Siunnersuisoqatigiit, tassani siulittaasup tulliata Josef Therkildsenip kajumissaarutigalugu sulisartut kattuffii, sulisitsisut kattuffii, kommunit allallu qaninniarluni paamisaarinerit pitsaaliornissaannut iliuuseqarfiginissaannullu iliuuseqarnissamut pilersaarusioqqullugit najoqqutassioqqullugillu.
– Akuerineqarsinnaanngilaq arnat angutilluunniit qaninniartunik paamisaarneqartarnerat. Taamaasiortittut inuttut atugarliortitaasorujussuusarput. Taamaattumik pingaaruteqarpoq qaninniarfigitilluni paamisaarfigitittup oqaatigissagaa taamaasiorneq akuerineqarsinnaanngitsoq.
Taanna oqarpoq Naligiissitaanermut Inatsit malillugu qaninniarluni paamisaarineq inerteqqutaasoq.
– Inummiilli inummut aammalu suliffeqarfimmit suliffeqarfimmut qaninniarluni paamisaarineq assigiinngitsumik isigineqartarpoq. Ileqqut, peqatigeeriaatsit isiginnittarnerillu assigiinngitsuusinnaapput, Josef Therkildsen oqarpoq erseqqissarlugulu qaninniartumik paamisaarneqartutu misigisimagaanni pingaaruteqartoq killiliisarnissaq.
Suliffimmi qaninniartunik paamisaarneqartarnermik ajornartorsiut qanoq annertugiaa? Suliffinni taamatut paamisaarneqarneq nammineq allalluunniit taamaasiortittut misiginikuuviuk? Oqaatsitigut attualaartilluniluunniit? Ataani akissuteqarit, Sermitsiaq.AG-llu taasisitsinerani peqataagit.