Savalimmiuni ajornartorsiorneq

Kaj Leo Johannesen qinersinissamik nalunaaruteqarpoq

Savalimmiormiut septembarip aallaqqaataani qinersissapput. Taamatut ullumi nalunaaruteqarpoq Savalimmiuni naalakkersuisut siulittaasuat Kaj Leo Johannesen

Savalimmiuni naalakkersuisut siulittaasuat Kaj Leo Holm Johannesen

Ullumi Savalimmiuni inatsisartut ukiuata nutaap aallartinneranut atatillugu ammaanersiornermi oqalugiarnermini Kaj Leo Johannesenip nalunaarutigaa qaammatip ataatsip missaa qaangiuppat, marlunngornermi septembarip aallaqqaataani, savalimmiuni qinersisoqassasoq.

Savalimmiuni piffissami sivisuumi politikkikkut aaqqiagiinngitsoqarsimavoq, naalakkersuisullu siulittaasuat immap naqqata ataatigut sulluliodrnissamik suliassami sakkortuumik tatineqarsimavoq.

Eqqunngitsunik paasissutissiisoq

Annertuumik misissuinermi, folketingip siusinnerusukkut ombudsmanderisimasaanit Hans Gammeltoft-Hansenimit siuttuuffigineqartumi, inerniliisoqarpoq naalakkersuisut siulittaasuat Inatsisartunut eqqunngitsumik paasissutissiisimasoq, taamaasillunilu naalakkersuisunut ilaasortatut akisussaassuseqarnermut inatsit unioqqutissimagaa.

Naalakkersuisut siulittaasuata ullumi ammaanersiorluni oqalugiarnermini aalajangiusimavaa inatsisartut piaaraluni eqqunngitsunik paasissutissimanagit.

Politikkimut oqaaseqartartoq Árni Gregesen Kringvarp Føroya-mut (savalimmiuni radio tv-lu, aaqqiss.) oqarpoq, naalakkersuisut siulittaasuat qinersinissamik nalunaaruteqartoq pisimasoq namminerminut nuanniitsoq sammitikkunnaarniarlugu.

Ammaanersiornermut atatillugu isorineqarpoq

Ammaanersiornermi oqalugiarnerup oqaluuserineqarnerani sulluliamutd tunngasoq annertuumik imaqassaaq, qinersinermulli atatillugu tamanut ammasumik oqallinnermi sammisassat allat aamma sammineqassapput.

Sulluliassamut misissuinermut atatillugu Hans Gammeltoft-Hansenip oqaatigaa akisussaassuseqarnermut inatsimmik unioqqutitsineq ima sualutsiginngitsoq, naalagaaffimmik salloqittaasutut eqqartuussinissamut imaluunniit pinerluuteqarsimasutut eqqartuussinissamut tunngavissaqarani.

Aalisarnermik aaqqissuusseqqinnissaq taamaatinneqarpoq

Naalakkersuisut siulittaasuat ammaanersiorluni oqalugiarnermini arlaleriarluni oqaatigisarpaa Savalimmiut ingerlalluartut, naatsorsuutigalugulu aappaagumut aningaasanut inatsisikkut sinneqartooruteqartoqassasoq.

Savalimmiunili aningaasaqarniarneq kipiluttunartoqarpoq, ukiumullu 750 millioner koruunit amigaatigineqarput pisortat ingerlatsinerat nukittorsarneqassappat, Aningaasaqarnermut Siunnersuisoqatigiit oqarsimapput.

Ilorraap tungaanut aallarnissamut aaqqissuusseqqinnerit arlallit ingerlanneqassapput, malunnarsisimavorli sammisaqarfinni angisuuni aaqqissuusseqqinnissanut isumaqatigiittoqarsinnaanngitsoq. Ilaatigut aalisarnerup aaqqissuuteqqinnissaa naalakkersuisut taamaatiinnarsimavaat.

Aamma partiit naalakkersuisooqatigiit sisamat soraarnerussutisiaqalernissamut aaqqissuusseqqinnissaq isumaqatigiinngissutigaat.

– Tamanna pissutaaqataavoq naalakkersuisut siulittaasuata qinersinissamik nalunaarutiginninneranut, Árni Gregersen Kringvarp Føroyamut oqarpoq.

Folketingimi nikittoqassaaq

Qinersineq qularnanngitsumik savalimmiormiut folketingimut ilaasortaatitaasa nikinnerannik kinguneqassaaq. Magni Arge, Republikanerne, Høgni Hoydalip sinniisua, aamma Sjúdur Skaale, Javnadarflokkurin-imeersoq (Socialdemokraterne, aaqqiss.) qularnanngitsumik inatsisartunut qinigassanngortissapput.

Qularnanngiarlu qinigaassasut, tamannalu Folketingimut ilaasortat nikinnerannik kinguneqarsinnaavoq.

Powered by Labrador CMS