ukiup affaanut nalunaarut
Kabelip kittorarnera Tele Postimut akisuvoq
Tele Post 2013-mi ukiup affaa siulleq akileraarutit sioqqullugit 49,2 millioner koruuninik sinneqartoorpoq sinneqartoorutillu amerlanerusinnaasimagaluarput
Nuummi Qaqortumilu flatratep atulernerata kingorna illoqarfinni taakkunani marlunni Tele Post atuisoqarnerulersimavoq. Mobilikkut internetimik atuineq aamma suliffeqarfiup aningaasarsiutigilluarpaa. Atuisut amerlinerat aningaarsiutaalluarpoq.
Tele Post 2013-mi ukiup affaa siulleq 49,2 millioner koruuninik sinneqartoorpoq. Imaatigulli kabelersuaq marloriarluni kittorarsimanngikkaluarpat suliffeqarfik sinneqartoornerusimassagaluarpoq taamatut ajutoornerit 14,5 millioner koruuninik aningaasartuutaammata. Kabelimik ajutoortoqarsimanngitsuuppat suliffeqarfik 2012-mi ukiup affaanut sanilliullugu 10 procentimik iluanaarnerusimassagaluartoq Tele Post nalunaarpoq.
- Internetimik atuinerup qaffannera Nuummi attavinnut avannaanilu radiop aqqutaanut aningaasaliinernik siuartitsinermik kinguneqarsimavoq. Aamma piumasoqarnera pissutigalugu Nuummi 4G-mut attavik aningaasaliiffigineqassaq mobilikkut internetimik atuerusunneq annertummat. Aamma Kalaallit Nunaanni internetimik atuinerulerneq pissutigalugu attaveqaatinut aningaasaliinerit annertuut pinissaat pilersaarutaavoq, Tele Postimi pisortaaneq Michael Binzer oqarpoq.