Housewarming
Kaalip toqoraavittaaq ammarpaa
Neqip toqoraavittaava arfininngormat ualikkut ammarnersiorneqarpoq oqalugiarnermik, pølsinik kipisinermikk neqinillu misiliititsinermik
Sulisut marluk, aappariit Augusta aamma Abia Josenius, nersorniarneqarput arfininngormat Neqip Qaqortumik toqoraavittaava atoqqaarfissiorneqarmat. Taakkua marluullutik savaaqqanik toqoraanermik suliaqarsimapput katillugit ukiuni 103-ni. Sapaatillu akunnerani tullermi Abia Josenius savaaqqanik toqoraanermi 53-issaa peqataassaaq avatangiisini nutaani, oqalugiarluni atoqqaarfissiorneqartuni.
Siullermik oqalugiarpoq Neqip pisortaa Carsten Jochumsen, tulliulluni KNI-p siulersuisuini siulittaasoq nutaaq Niels Thomsen kingornatigullu borgmester Jørgen Wæver Johansen.
Atoqqaarfissiortitsinermi oqalugiartoq kingulleq tassaavoq aalisarnermut, piniarnermut nunalerinermullu Naalakersuisoq Karl Lyberth, taassumalu Narsami innuttaasut, Kommune Kujalleq, KNI-p siulersuisui, Neqip sulisui Kalaallillu Nunaat tamaat toqoraavittaarsuarmik pilluaqquvai. Toqoraavik nutaaliaalluinnartoq Narsami suliffissanik pisariaqartinneqartunik pilersitsisoq.
– Toqoraavik nunalerinermi uumasuutitsinnik pitsaanerusumik atuisitsilissaaq, neqinik nioqqutissianik pitsaasumik ineriartortitsilluni, taanna oqarpoq nangillunilu:
– Kalaallit savaaraataat mamassuseqarluartut issittumi qooqquni peroriartorsimasut immaqa allaat avammut tuniniarneqalersinnaapput.
– Uumasuutinik naatitanillu pilersuisut unammilligassarujussuaqarput, aammattaarli nunalerinermut kommissionip suliaanut atatillugu ineriartornissamut periarfissarissaassallutik, Karl Lyberth oqarpoq neriuutigaalu Nunatta sinneranut assartuinermi aaqqissutissaqassasoq, pilersuineq ataavartumik ingerlaniassammat.
Oqalutigiarnerup kingorna pisarnertut allunaasaq aappalaartoq kipineqarpoq. Allunaasarlu savaaqqanik pølsiliamik taarserneqarsimavoq.
Quianarniartup siunnersuutigaa pølsit kipineqartussat aappalaartuussasut, tunisassiornermullu pisortap akivaa Neqi taamaallaat pølsinik økologiskinik tunisassiortassasoq, toqoraavimminilu pølsinik aappalaartyunik allamilluunniit qalipassimasunik takorusunnani.
Pisortatigoortumik oqalugiaatit kingorna Neqi tunisassiarpassuarminik sassaallerpoq, ilaatigut spegepølsiliat nutaat arlallit, qanittukkut tuniniarneqalissagunartut.