akit
K. Jeremiassen: Pilersuisoq immikkoortitsivoq
Illoqarfinni aalajangersimasuni Pilersuisuni illoqarfinnit allanit pitsaanerusumik neqerooruteqartarpoq. Inatsisartuni ilaasortap tamanna iliuuseqarfigineqartariaqartutut isigaa
Inatsisartunut ilaasortaq Kristian Jeremiassen Siumut, isumaqarpoq Pilersuisoq sullitaminut immikkoortitsisoq. Illoqarfinni aalajangersimasuni Pilersuisumi ajunnginnerusumik neqerooruteqartarnerit iliuuseqarfigeqquai.
Kristian Jeremiassen paragraf 37-ikkut naalakkersuisunut apeqquteqarpoq, sooq illoqarfiit aalajangersimasut kisimik pitsaanerusunik neqeroorfineqartarnersut.
- Pilersuisoq.gl-p qupperaanni takuneqarsinnaavoq Nanortalimmi, Narsami, Paamiuni Aasiannilu neqeroorutit taamaallaat taakkunani atuuttut. Allallu illoqarfippassuit nunaqarfippassuillu Pilersuisumiit pisiniarfillit pitsaasunik neqeroorutinik saqqummiussiffigineqaratik, Kristian Jeremiassen oqarpoq.
Illoqarfinni pisiniarfinni unammilleqatigiiffiusuni illoqarfinnit unammilleqatigiiffiunngitsuniittut tamanna akilersorneraat aperaaq.
Kristian Jeremiassenip piumasaqaatigaa neqeroorutigineqartut tamarmik assigiilernissaat.
- Inuuniarneq akittoraluttuinnartoq inuussutissat tungaasigut, Pilersuisoq pitsaanerusumik neqerooruteqartariaqarpoq, tassami pissusissamisuunngilaq Pilersuisoqarfimmiut ilai kisimik ajunnginnerusumik neqeroorfigineqassasut. Qujarunnartaqaaq Pilersuisoq neqerooraangat kisiannili immikkoortinneqartutut misigisimavugut Nanortalimmi Narsami Paamiuni Aasiannilu najugaqanngittugut, Kristian Jeremiassen Qasigiannguani najugaqartoq oqarpoq.