Piumaneqaqisut
Jyllandip avannaani bussit kalaallit erfalasuat angumerinngitsoorpaat
Ullumi Kalaallit Nunaata inuiattut ullorsiornera pissutigalugu Danmarkimi pisortat illuutaat tamarmik kalaallit erfalasuannik amusinikuusut, Jyllandip avannaani bussit qallunaat erfalasuat aappalaartumik qaqortumillu qalipaatilik naammagiinnartariaqarpaat
– Kalaallit erfalasuat piiumaneqangaarmat erfalasuliorfimmit pissarsiarinissaat angumerisinnaasimanngilarput, Nordjyllands Trafikselskabimi (NT) tusagassiinermut akisussaasoq Sanne Nørgaard oqaluttuarpoq.
Naalakkersuisut ukioq manna marsimi aalajangermata Kalaallit Nunaata Savalimmiullu inuiattut ullorsiorneranni pisortat nunat taakku marluk erfalasui amusalissagaat, selskabi aalajangersimavoq aamma nammineq taamaasiorniarluni.
Piffissakimmat
– Jyllandip avannaa tamatigut Kalaallit Nunaannut Savalimmiunullu attuumassuteqarluartartorujussuusimavoq, taamaattumik qularutigisimanngilluinnarsimavarput tamaani bussit aamma inuiattut ullorsiornernik nalliusseqataasassasut, Aalborgip borgmesteria Thomas Kastrup-Larsen (S) oqarpoq, taannalu aamma NT-mi siulittaasuuvoq.
Jyllandilli avannaani bussinut Erfalasorput mersorneqarnissaanut piffissakippallaarsimavoq.
Bussinut 200-nut
– Aappaagumiilli kalaallit inuiattut ullorsiorneranni kalaallit erfalasuannik erfalasoqartalissaagut, Sanne Nørgaard, Nordjyllands Trafikselskabimeersoq oqarpoq.
Taanna oqaluttuarpoq savalimmiormiut juulip 29-anni inuiattut ullorsiorneranni, bussit savalimmiormiut erfalasuannik erfalasoqarnissaat angumerisinnaanngikkitsik.
– Kalaallilli savalimmiormiullu erfalasuinik bussinut 200-nut pisiniareersimavugut - taakkualu 2017-imi erfalasulerfissat nallertinnagit tigujumaarpavut, aqqusinikkut angallassinermik selskabi oqarpoq.